काठमाडौं । एमाले अध्यक्ष केपी शर्मा ओलीले परिपक्व लोकतन्त्रमा भोट भावना भड्काएर होइन, तथ्य प्रस्तुत गरेर माग्नु पर्ने बताउनु भएको छ ।
सामाजिक संञ्जाल मार्फत ओलीले बहकाउमा होइन, कामको हिसाब सुनाएर मत माग्नु पर्ने जनाउनु भएको छ ।
उहाँले एमालेका उम्मेदवार र प्रचारकहरुलाई एमाले प्रश्नहरूको अग्निपरीक्षाबाट खारिएर बनेको राजनीतिक विरासत भएकोले प्रश्नहरुको सामाना गरेर अघि बढ्न सुझाब दिनुभएको छ ।
उहाँले लेख्नुभएको छ
देशभर चुनावी मैदानमा खडा भएका हाम्रो पार्टी नेकपा (एमाले)का उम्मेदवार र प्रचारक साथीहरूलाई मेरो आग्रह छ-
मतदातालाई हामीले गरेका कामहरूको स्पष्ट विवरण सुनाउनुहोस्। उहाँहरूको प्रश्न धैर्यपूर्वक सुन्नुहोस्।
किनकि एमाले प्रश्नहरूको अग्निपरीक्षाबाट खारिएर बनेको राजनीतिक विरासत हो।
परिपक्व लोकतन्त्रमा भोट भावना भड्काएर होइन, तथ्य प्रस्तुत गरेर माग्नु पर्छ। बहकाउमा होइन, कामको हिसाब सुनाएर मत माग्नु पर्छ। मतदातालाई भ्रमको डिजिटल ‘इको च्याम्बर’ भित्र कैद गरेर होइन, उम्मेदवारसँग आँखा जुधाएर, प्रश्न गर्ने अवसर दिएर, उत्तर सुनाएर, सत्य छुट्याएर मतदान गर्ने अवसर दिनु पर्छ।
‘साइको थ्रेट’ले भन्छ- चुपचाप छाप।
स्वस्थ निर्वाचन संस्कृतिले भन्छ- आँखा जुधाएर विमर्श र निर्णय।
त्यसैले हाम्रो आह्वान-
चुपचाप छाप होइन, सोचीविचारी छाप।
आँखा खोलेर भविष्य निर्माण।
