एजेन्सी । शाहिद कपूर र तृप्ति डिमरी अभिनीत फिल्म ‘ओ रोमियो’को ट्रेलर लन्च कार्यक्रम बुधबार आयोजना गरिएको थियो।
कार्यक्रममा वरिष्ठ अभिनेता नाना पाटेकर पनि सहभागी थिए। तर लिड कलाकारहरू शाहिद र तृप्ति समयमै नपुगेपछि नाना पाटेकर आक्रोशित हुँदै कार्यक्रमबाट बाहिरिए।
एनडीटीभीका अनुसार कार्यक्रम दिउँसो १२ बजे सुरु हुने तय थियो। समयप्रति कडाइ गर्ने स्वभावका नाना पाटेकर ठिक समयमा कार्यक्रमस्थल पुगे पनि शाहिद र तृप्ति एक घण्टासम्म नआएपछि उनी रिसाएका थिए।
लामो समय कुर्दासमेत कार्यक्रम सुरु नभएपछि नाना कार्यक्रम छोडेर निस्किएका हुन्। उनी बाहिरिँदै गर्दा फिल्म टिमले रोक्ने प्रयास गरेको भिडियो पनि सार्वजनिक भएको छ।
यस विषयमा फिल्मका निर्देशक विशाल भारद्वाजले प्रतिक्रिया दिएका छन्। उनले नानाको स्वभावलाई उनको ‘सिग्नेचर स्टाइल’ भन्दै २७ वर्षको मित्रता र पहिलोपटक सँगै काम गरेको अनुभव उल्लेख गरे। एक घण्टा कुर्नुपरेपछि नाना उठेर जानु स्वाभाविक भएको उनले बताए।
फिल्म ‘ओ रोमियो’ १३ फेब्रुअरीमा प्रदर्शनमा आउने तयारीमा छ। फिल्ममा शाहिद कपूर, तृप्ति डिमरी, अविनाश तिवारी, फरीदा जलाल र रणदीप हुड्डाको अभिनय रहेको छ।
