काठमाडौँ । प्रधानमन्त्री सुशीला कार्की र नेकपा एमालेका अध्यक्ष केपी शर्मा ओलीबीच करिब चार घण्टा लामो छलफल भएको छ। प्रधानमन्त्रीको सरकारी निवास बालुवाटारमा बिहीबार दिउँसो दुईबीच भेटवार्ता तथा विस्तृत छलफल भएको प्रधानमन्त्रीको सचिवालयले जनाएको छ।
दिउँसो ११ बजेदेखि साढे २ बजेसम्म भएको भेटमा मुख्य रूपमा फागुन २१ गते हुने निर्वाचनलाई केन्द्रमा राखेर छलफल भएको बताइएको छ। निर्वाचनको तयारी, समग्र अवस्था तथा सुरक्षा व्यवस्थाबारे अध्यक्ष ओलीले चासो व्यक्त गरेका थिए।
जवाफमा प्रधानमन्त्री कार्कीले सरकारले आवश्यक सबै प्रबन्ध मिलाइसकेको र ढुक्क भएर निर्वाचनमा सहभागी हुन आग्रह गरेको प्रधानमन्त्रीको सचिवालयले जनाएको छ।
भेटका क्रममा अध्यक्ष ओलीले प्रधानमन्त्री कार्कीका श्रीमान् दुर्गा सुवेदीको स्वास्थ्य अवस्थाबारे पनि चासो राखेका थिए। त्यसै क्रममा प्रधानमन्त्री कार्कीले बदलिएको राजनीतिक परिस्थितिमा पनि नेकपा एमालेले निर्वाचन केन्द्रित गतिविधिमा सक्रिय सहभागिता जनाएकोप्रति खुसी व्यक्त गर्दै, चुनौतीपूर्ण अवस्थामा समेत पार्टीको महाधिवेशन सम्पन्न गरी राजनीतिक गतिविधि निरन्तरता दिएकोमा धन्यवाद दिएकी थिइन्।
प्रधानमन्त्रीसँगको संवादका क्रममा अध्यक्ष ओलीले निर्वाचनको अनुकूल वातावरण बनेको खण्डमा एमाले चुनावबाट नभाग्ने स्पष्ट विश्वास दिलाएका थिए। यो भेटवार्तालाई आसन्न निर्वाचनको सन्दर्भमा महत्त्वपूर्ण राजनीतिक संवादका रूपमा हेरिएको छ।
