काठमाडौं । नेपाली कांग्रेसका महामन्त्री विश्वप्रकाश शर्माले आगामी प्रतिनिधि सभाको निर्वाचनमा उम्मेदवार नबन्ने घोषणा गर्नुभएको छ ।
बिहीबार कांग्रेसको केन्द्रीय कार्यसम्पादन समितिको बैठकमा महामन्त्री शर्माले उम्मेदवार नबन्ने जानकारी गराउनु भएको हो ।
बैठकमा बोल्दै शर्माले भन्नुभयो- ‘लगातार तीन पटक उम्मेदवार बनिसकेकोले यो पटक आफू उम्मेदवार नबनेर अरु साथीहरूलाई अघि सार्ने प्रस्ताव क्षेत्रमा गरेर आएको जानकारी गराउँदछु ।’
बैठकमा शर्माले भन्नुभयो- ‘गत चुनावमा म आफ्नो क्षेत्रमा सिमित थिएँ, यो पटक देशव्यापी रुपमा पार्टीका उम्मेदवारहरुको साथमा पुग्नेछु।’
उहाँले आगामी चुनावमा उम्मेदवार परिवर्तन गरेर जानुपर्ने बताउनु भयो । उहाँले भन्नुभयो ‘आफ्नो पावरले भ्याएसम्म उम्मेदवार बन्ने। जित्दा त कुरै भएन, हार्दा पनि क्षेत्र नछाड्ने। एक क्षेत्रमा हारे अर्को क्षेत्रमा वा एउटा तहमा हारे अर्कोमा भए पनि उम्मेदवार बन्नैपर्ने। बाँचुन्जेल, क्षेत्र कब्जाको सोच राख्ने। सासले भ्याएसम्म मन्त्री रहिरहनु पर्ने। हाम्रो राजनीतिको यो प्रवृत्ति भत्काउन जरुरी छ ।’
