काठमाडौँ । नवनियुक्त प्रेस काउन्सिल नेपालका अध्यक्ष कुमार शर्मा आचार्यले नियुक्ति पत्र बुझ्नुभएको छ ।
आईतवार सञ्चार तथा सूचना प्रविधि मन्त्रालयमा मन्त्री जगदीश खरेलले अध्यक्ष आचार्यलाई नियुक्ति पत्र प्रदान गर्नुभयो । सरकारले गत सोमवार आचार्यलाई रिक्त अध्यक्ष पदमा मनोनयन गरेको थियो । नियुक्ति पत्र प्रदान गर्न आयोजित कार्यक्रममा बोल्दै मन्त्री खरेलले आम सञ्चारमाध्यम र न्यु मिडियालाई थप व्यवस्थित, मर्यादित र जनउत्तरदायी बनाउनुपर्ने आवश्यकता रहेको उल्लेख गर्दै सोहीअनुसार अगाडि बढ्न आग्रह गर्नुभयो । उहाँले समग्र सञ्चार क्षेत्रको सुधारका लागि संविधान र कानूनको परिधिभित्र रहेर काउन्सिलले प्रभावकारी काम गर्नुपर्ने अवस्था रहेको बताउनु भयो ।
उहाँले भ्रष्टाचार नियन्त्रण गर्दै मुलुकमा सुशासन कायम गर्न लागिपरेको पनि बताउनु भयो । उहाँले घोषित मितिमा स्वच्छ, निष्पक्ष र भयरहित वातावरणमा बढाउनुपर्ने अवस्थामा जिम्मेवार सरोकारवालाबाटै भ्रामक सूचना र समाचारहरु संप्रेषण भइरहेको भन्दै आपत्ति पनि जनाउनु भयो । साइबर आक्रमण नै सरकारको लागि मुख्य चुनौति रहेको मन्त्री खरेलको भनाइ छ ।
उहाँले भन्नुभयो, ‘नेपालको आम सञ्चारमाध्यमलाई र सामाजिक सञ्जालहरुलाई अझै व्यवस्थित र मर्यादित र जनउत्तरदायी बनाउनुपर्ने आवश्यकता छ । त्यो आवश्यकता निर्वाह गर्ने सन्दर्भमा प्रेस काउन्सिलले संविधान र कानूनले दिएको जिम्मेवारी तथा कर्तव्य वहन गर्दै प्रभावकारी काम गर्नुपर्ने अवस्था छ । लामो सयमदेखि अध्यक्षविहीन भएको प्रेस काउन्सिलले काम गर्न सक्ने अवस्था थिएन । अब प्रभावकारी ढंगले काम गर्छ भन्ने अपेक्षा छ । सरकारले अगमी फागुन २१ मा निर्वाचनो मिति तोकेपछि त्यहीअनुसारको काम अगाडि बढाइरहेका छौं । सुशासन र भ्रष्टाचार नियन्त्रण गर्नको लागि पनि सरकारले काम अगाडि बढाइरहेको छ । यस अवस्थामा निर्वाचनलाई स्वच्छ, निष्पक्ष र धाँधलीरहीत बनाउने अवस्थामा पनि सरोकारवालाहबाटै भ्रामक कुराहरु आइरहेको छ । साइबर अट्याक जेजसरी भइरहेको छ त्यो हाम्रो लागि ठुलो चुनौतीको विषय पनि बनेको छ ।’
प्रेस काउन्सिल नेपालका अध्यक्ष आचार्यले सञ्चारमाध्यमलाई थप व्यवस्थित बनाउँदै मुलुकमा सुशासन कायम गर्ने सवालमा महत्वपूर्ण भुमिका खेल्ने प्रतिबद्धता व्यक्त गर्नुभो । उहाँले सञ्चारमाध्यमलाई जिम्मेवार र जनउत्तरदायी बनाउने आफ्नो महत्वपूर्ण जिम्मेवारी रहेको पनि बताउनु भयो ।
उहाँले भन्नुभयो, ‘मेरो प्राथमिकतामा संस्थागत र आर्थिक भ्रष्टाचार कसरी अन्त्य गर्न सकिन्छ भन्नेमा रहनेछ । मेरो मुख्य जिम्मेवारी व्यक्तिलाई सही जानकारी प्रभाव गर्न सञ्चारमाध्यमलाई थप जिम्मेवारी बनाउने हो । यसका लागि सरकार, सञ्चारकर्मी र आम नागरिकका कुरामार्फत नागरिकको सही सूचना पाउने हक सुनिश्चित गर्न लागिपर्नेछु । म अधिकारको प्रयोग गर्दिनँ, म कर्तव्य निर्वाह गर्छु ।’
काउन्सिलमा रहँदा अधिकारको प्रयोग नभई कर्तव्य निर्वाह गर्ने समेत उहाँको भनाइ छ ।
