काठमाडौं । अख्तियार दुरुपयोग अनुसन्धान आयोगले पोखरा अन्तर्राष्ट्रिय विमानस्थल निर्माण प्रक्रियामा भएको भनिएका अनियमितता र भ्रष्टाचारसम्बन्धी मुद्दा दायर गर्ने निर्णय गरेको छ। आयोगका अनुसार अहिले विशेष अदालतमा मुद्दा दर्ता गर्ने प्रक्रिया अगाडि बढिरहेको छ।
अख्तियारले तत्कालीन पाँच जना मन्त्रीसहित सम्बन्धित व्यक्तिहरूलाई विपक्षी बनाएर ८ अर्ब ३६ करोड रुपैयाँ बिगो मागदाबीसहित मुद्दा विशेष अदालतमा दर्ता गर्न लागेको हो।
मुद्दामा विपक्षी बनाइएका मन्त्रीहरूमा भीम आचार्य, रामकुमार श्रेष्ठ, दीपक अमात्य, रामशरण महत र पोष्टबहादुर बोगटी रहेका छन्। बोगटीको निधन भइसकेकाले उनको ठाउँमा उनकी पत्नी राममाया बोगटीलाई प्रतिवादी बनाइएको अख्तियारले जनाएको छ।
आयोगले विमानस्थल निर्माणका विभिन्न चरणमा देखिएका अनियमितता, निर्णय प्रक्रिया र सरकारी धनको दुरुपयोगबारे अनुसन्धानपछि मुद्दा दायर गर्ने निर्णय गरेको बताइएको छ।
