काठमाडौँ । राष्ट्रिय प्रजातन्त्र पार्टी (राप्रपा)ले रुपन्देही क्षेत्र नं ३ मा हुने प्रतिनिधिसभा उपनिर्वाचनका लागि आन्तरिक प्रारम्भिक निर्वाचनमार्फत उम्मेदवार छान्ने निर्णय गरेको छ ।
पार्टी अध्यक्ष तथा संसदीय समितिका अध्यक्ष राजेन्द्र लिङ्देनको अध्यक्षतामा काठमाडौंको धुम्बाराहीस्थित केन्द्रीय कार्यालयमा बसेको संसदीय समितिको बैठकले यस्तो निर्णय गरेको हो ।
बैठकले आगामी कार्तिक १७ गते हुने उपनिर्वाचनका लागि उम्मेदवार छनोट प्रक्रियामा नवीन कार्ययोजनाको मोडल प्रयोग गर्ने निर्णय गर्दै यसलाई ‘नवीन अभ्यास’ को रूपमा अघि बढाउने जनाएको छ ।
यसअन्तर्गत रुपन्देही जिल्ला कार्यसमितिबाट सिफारिस भएका आकांक्षीमध्येबाट आन्तरिक लोकतान्त्रिक प्रक्रियाबाट उम्मेदवार छानिने छ ।
प्रवक्ता एवं प्रचार विभाग प्रमुख मोहनकुमार श्रेष्ठका अनुसार प्रारम्भिक निर्वाचन यथाशिघ्र सम्पन्न गरिनेछ ।
त्यसका लागि आवश्यक सम्पूर्ण प्रबन्ध रुपन्देही उपनिर्वाचन परिचालन समितिले गर्ने उनले बताए ।
आन्तरिक प्रारम्भिक निर्वाचनका मतदाताहरु यसप्रकार रहनेछः
क. रुपन्देही–३ अन्तर्गतका सबै उपमहानगर, नगर, गाउँपालिका र वडा कार्यसमितिका पदाधिकारी तथा सदस्यहरु ।
ख. रुपन्देही–३ अन्तर्गतका प्रदेशसभा (क) र (ख) कार्यसमितिका पदाधिकारी तथा सदस्यहरु ।
ग. रुपन्देही–३ को प्रतिनिधिसभा क्षेत्रीय कार्यसमितिका पदाधिकारी तथा सदस्यहरु ।
घ. रुपन्देही–३ बाट प्रतिनिधित्व गर्ने जिल्ला कार्यसमितिका पदाधिकारी तथा सदस्यहरु ।
ङ. रुपन्देही–३ बाट प्रतिनिधित्व गर्ने प्रदेश कार्यसमितिका पदाधिकारी तथा सदस्यहरु ।
च. रुपन्देही जिल्ला क्षेत्र नं–३ बाट प्रतिनिधित्व गर्ने केन्द्रीय सदस्य तथा पदाधिकारीहरु ।
छ. २०८२ भदौ १७ गतेसम्म कायम रहेका रुपन्देही–३ भित्रका केन्द्रदेखि जिल्ला तहसम्मका भातृ संगठनका पदाधिकारी तथा सदस्यहरु ।
ज. २०८२ भदौ १७ सम्ममा सक्रिय सदस्य भइसकेका रुपन्देही–३ अन्तर्गतका सक्रिय सदस्यहरु रहनेछन् ।
