काठमाडौं: नेपाल प्रहरीको काठमाडौं उपत्यका अपराध अनुसन्धान कार्यालय, टेकुले बैदेशिक रोजगारी सम्बन्धी ठगी कार्यमा संलग्न चार जनालाई पक्राउ गरेको छ ।
पक्राउ परेकाहरुमा तनहुँको भानु नगरपालिका स्थायी ठेगाना रहेका योगराज गुरुङ, सर्लाहीको लालबन्दीका खेम कुमारी श्रेष्ठ मानन्धर, बाग्लुङ जैमिनीका रामचन्द्र शर्मा र सुनसरीको धरानका राजु मगर रहेका छन् ।
प्रहरीका अनुसार, योगराज गुरुङले एक व्यक्तिलाई क्यानडा पठाइदिन्छु भन्दै पीडितबाट आठ लाख रुपैयाँ लिएका थिए । त्यस्तै, खेम कुमारीले चार जनाबाट पाँच लाख लिई युएई पठाइदिन्छु भन्दै रकम लिएकी थिइन् ।
रामचन्द्र शर्माले भने पूर्वी युरोपेली मुलुक क्रोएसिया पठाइदिन्छु भन्दै एक व्यक्तिबाट दुई लाख ३५ हजार लिएर फरार भएका थिए । त्यस्तै, एक व्यक्तिलाई अमेरिका पठाइदिन्छु भन्दै चार लाख रुपैयाँ लिएर फरार थिए ।
बेरोजगार युवायुवतीलाई आकर्षक तलबको प्रलोभनमा पारेर लामो समयसम्म झुक्याउँदै आएपछि पीडितहरुले प्रहरी समक्ष निवेदन दिएका थिए ।
पक्राउ परेका व्यक्तिलाई थप अनुसन्धान र कारबाही गर्न बैदेशिक रोजगार विभाग, ताहाचल पठाइएको अपराध अनुसन्धान कार्यालयका सूचना अधिकारी एवं प्रहरी उपरीक्षक काजी कुमार आचार्यले बताएका छन् ।
