काठमाडौं।वागमती प्रदेशका मुख्यमन्त्री बहादुर सिंह लामाले पदबाट राजीनामा दिनुभएको छ ।
आईतवार पत्रकार सम्मेलन गर्दै उहाँँले पदबाट राजीनामा दिनुभएको हो । लामा २०८१ साउन ९ गते वागमती प्रदेशको मुख्यमन्त्री बन्नुभएको थियो । पार्टी संसदीय दलको नेतामा इन्द्रबहादुर बानियाँसँग पराजित भएसँगै पदबाट राजीनामा दिनुपर्ने दबाब बढेको थियो । आईतवार साँझ प्रदेश प्रमुख दीपक देवकोटालाई राजीनामा पत्र बुझाउनुभएको हो ।
राजीनामा पत्र बुझाएपछि सञ्चारकर्मीहरुसँग कुरा गर्दै उहाँले राजनीतिक षड्यन्त्रबाट सरकार ढालिएको आरोप लगाउनु भयो । पत्रकार सम्मेलनमा उहाँले आफ्नो कार्यकालमा भएका प्रगति विवरण समेत प्रश्तुत गर्नुभएको थियो ।
आफ्नो नेतृत्वको सरकारले विपद् व्यवस्थापन, भौतिक पूर्वाधार विकास, पुँजीगत खर्च, राजश्व संकलनको क्षेत्रमा उल्लेख सुधार गरेको उहाँलको दाबी गर्नुभएको छ । प्राकृतिक विपतको समयमा क्षतिग्रस्त भौतिक पूर्वाधारको मर्मत सम्भारको लागि दु्रत प्रतिकार्य टोली गठन गरिएको उहाँले बताउनुभयो । आफ्नो कार्यकालमा २१ वटा रुग्ण आयोजनाको निर्माण सम्पन्न गरेको उहाँले दाबी गर्नुभयो ।
मुख्यमन्त्री लामाले आफ्नो नेतृत्वको सरकारले राजश्व संकलनमा पनि वृद्धि गरेको दाबी गर्नुभएको छ । यसैगरी आफ्नो एक वर्षे कार्यकालमा सेवा प्रवाहलाई प्रविधिमैत्री बनाउन डिजिटलाईजेसन गर्ने प्रक्रियालाई सुरु गरिएको समेत उहाँले बताउनुभयो । सुशासन प्रवद्र्धनका निम्ति भ्रष्टाचार विरुद्धको प्रादेशिक कार्ययोजना बनाई कार्यान्वयनमा ल्याउने कार्यक्रमहरुलाई प्राथमिकता दिएको उहाँको भनाई छ ।
मुख्यमन्त्री लामाले प्रदेशमा मात्र नभई स्थानीय तहसम्म पनि शासकीय सवलीकरण गर्ने दिशामा प्रदेश सरकार अगाडि बढेको दाबी गर्नुभयो । लामाले राजीनामा दिएसँगै बागमतीको मुख्यमन्त्री दलको नेताको रूपमा इन्द्र बानियाँ हुनेछन् । सत्तासाझेदार दल नेकपा एमालेसँग एकवर्षअघि भएको सरकारको नेतृत्व गर्ने समयावधिको सहमतिअनुसार अब हुने भनिएका मुख्यमन्त्री बानियाँले ८ महिना सरकार सञ्चालन गर्नेछन् ।
पार्टी सभापति शेरबहादुर देउवाको बुढानीलकण्ठस्थित निवासमा हिजो दोस्रो पटक छलफलपछि लामा राजीनामा दिन तयार हुनु भएको थियो । उहाले आफ्ना तीन जना सांसदलाई मन्त्री बनाउनुपर्ने सर्त राख्नु भएको छ ।
राजीनामापछि कांग्रेस प्रदेश संसदीय दलका नेता इन्द्रबहादुर बानियाँको नेतृत्वमा बागमतीमा नयाँ सरकार गठनको बाटो खुलेको छ ।
तस्बिर : अञ्जली थापा/रासस
