काठमाडौं । नेपालमा अधिकतम १० हजार संक्रमित पुगेको अवस्थामा कोरोना भाइरस (कोभिड–१९) शीर्षकमा झन्डै सात अर्ब रुपैयाँ खर्च हुने प्रारम्भिक अनुमान गरिएको छ । स्वास्थ्य तथा जनसंख्या मन्त्रालयले तयार पारेको स्वास्थ्य क्षेत्र आपतकालीन प्रतिक्रिया योजनामा कोभिड–१९ लाई मध्यनजर गर्दै सार्वजनिक स्वास्थ्य, अस्पताल व्यवस्थापन, सूचना प्रणाली, उपचारलगायत शीर्षकमा ६ अर्ब ८९ करोड ९ लाख ३९ हजार रुपैयाँ खर्च हुने प्रक्षेपण गरिएकोे हो । केन्द्रमा १ अर्ब ९३ करोड २६ लाख ७२ हजार रुपैयाँ र प्रदेश तथा स्थानीय तहमा ४ अर्ब ९५ करोड ८२ लाख ६७ हजार रुपैयाँ खर्च हुने प्रारम्भिक अनुमान गरिएकोे छ । क्वारेन्टिन व्यवस्थापनका लागि केन्द्रमा २१ करोड २३ लाख १० हजार रुपैयाँ, स्थानीय र प्रदेश तहमा २ अर्ब १२ करोड ३१ लख खर्च हुने प्रक्षेपण गरिएकोे छ ।
अधिकतम १० हजार संक्रमित मुख्य आधार
यस्तै, केस अनुसन्धान र कन्ट्याक्ट ट्रेसिङका लागि केन्द्रमा ५० लाख, प्रदेश र स्थानीय तहमा ५ करोड ५० लाख रुपैयाँ खर्च हुने अनुमान गरिएकोे छ । सामुदायस्तरमा स्क्रिनिङ र टेस्टिङका लागि केन्द्रमा ४ करोड २५ लाख ३० हजार रुपैयाँ, प्रदेश र स्थानीय तहमा १७ करोड १ लाख २१ हजार रुपैयाँ खर्च हुने अनुमान गरिएकोे छ । संक्रमितको उपचार शीर्षकमा स्थानीय तह र प्रदेशमा १ अर्ब ६० करोड १८ लाख ७५ हजार रुपैयाँ तथा केन्द्रमा ७५ करोड ६१ लाख २४ हजार रुपैयाँ खर्च हुने प्रारम्भिक प्रक्षेपण गरिएको छ । निगरानी शीर्षकमा केन्द्रमा ४ करोड ६० लाख, प्रदेश र स्थानीय तहमा ५० लाख खर्च हुने प्रक्षेपण गरिएकोे छ । यस्तै, समुदायको सहभागिता र जोखिम सञ्चार शीर्षकमा केन्द्रमा १ करोड पाँच लाख रुपैयाँ, प्रदेश र स्थानीय तहमा २२ करोड ५० लाख रुपैयाँ खर्च हुने प्रारम्भिक अनुमान गरिएकोे छ ।
स्वास्थ्य तथा जनसंख्या मन्त्रालयका विज्ञ सल्लाहकार डा. खेम कार्कीले कोभिड–१९ रोकथाम नियन्त्रणका लागि सरकारले खर्चसम्बन्धी प्रारम्भिक प्रक्षेपण तयार पारेको बताए । उनले भने, ‘संक्रमण दर बढ्दै गयो भने जुन क्षेत्रमा संक्रमण फैलिएको छ, त्यस क्षेत्रमा रहेका अस्पतालको स्तरवृद्धि गर्न आवश्यक छ ।’
संक्रमित ७ सय ७२ पुगे
कोरोना भाइरसबाट संक्रमित हुनेको संख्या ७ सय ७२ पुगेको छ । मंगलबार मात्रै ९० जना संक्रमित थपिएका छन् । स्वास्थ्य मन्त्रालयका प्रवक्ता डा. विकास देवकोटाका अनुसार ५ सय ८२ जना आइसोलेसनमा उपचाररत छन् । हालसम्म ५४ हजार ४ सय २४ जनाको आरटी–पीसीआर विधिबाट कोरोना परीक्षण भएको छ । कोरोनाको आशंकामा पछिल्लो २४ घण्टामा ३ हजार ७ सय ८२ जनाको पीसीआरबाट नमुना परीक्षण भएको छ ।
स्वास्थ्य तथा जनसंख्या मन्त्रालयका अनुसार ५५ हजार २ सय ८२ जना क्वारेन्टिनमा बसेका छन् । विभिन्न अस्पतालमा उपचाररतमध्ये १ सय ५५ जना निको भई घर फर्किएका छन् । ४६ जिल्लामा संक्रमण पुष्टि भइसकेको स्वास्थ्य मन्त्रालयले जनाएको छ । कोरोनाबाट मृत्यु हुनेको संख्या चार पुगेको छ । राजधानी दैनिक
