काठमाडौं। लायन्स इन्टरनेसनल मल्टिपल डिष्ट्रिक्ट ३२५ को ५४ वर्षको इतिहासमा पहिलोपटक महिला नेतृत्व स्थापित भएको छ। डिष्ट्रिक्ट ३२५ जे की गभर्नर लायन मिलन थापा आगामी लायन वर्ष २०२५ का लागि मल्टिपल काउन्सिल चियरपर्सनमा निर्विरोध निर्वाचित भएकी हुन्।
निर्वाचनका लागि तोकिएको समयसीमाभित्र थापाको मात्र उम्मेदवारी परेको हुँदा उनी निर्विरोध बन्न पुगेकी हुन्। औपचारिक घोषणा भने आगामी मल्टिपल कन्भेन्सनमा प्रज्ञा प्रतिष्ठानमा गरिनेछ।
लायन थापा लामो समयदेखि महिला सशक्तीकरण, शिक्षा र स्वास्थ्यको क्षेत्रमा सक्रिय हुँदै समाजसेवामा समर्पित रहिएकी छिन्। उनको यो विजयलाई नेपाली लायनिज्ममा समावेशी नेतृत्वको प्रतीकका रूपमा हेरिएको छ।
साथै, मल्टिपल काउन्सिलको सेक्रेटरीमा डिष्ट्रिक्ट ३२५ सी का इलेक्ट गभर्नर लायन बबरजंग थापा र ट्रेजररमा डिष्ट्रिक्ट आर का इलेक्ट गभर्नर लायन नवराज सापकोटा पनि निर्विरोध निर्वाचित भएका छन्। भाईस काउन्सिल चियरपर्सन पदका लागि भने तीन जनाको उम्मेदवारी परेको छ।
निर्वाचनपछि थापाले आफ्नो जीतले नेपाली लायनिज्ममा नयाँ इतिहास रचेको बताउँदै, यो पद समर्पण र परिवर्तनको अवसर भएको उल्लेख गरिन्। साथै, सबैको साथ र सहयोगप्रति आभार प्रकट गर्दै जिम्मेवारीमा कुनै कमी नहुने प्रतिबद्धता व्यक्त गरिन्।
