विराटनगर । आम जनता पार्टी (आजपा)का सहअध्यक्ष एवं संविधान सभाका सदस्य तिलक थापामगरले दलाल दलतन्त्रका कारण मुलुकको अर्थतन्त्र धरासायी बन्दै गईरहेको बताएका छन् ।
आजपा कोशी प्रदेशले आज विराटनगरमा आयोजना गरेको ‘वर्तमान व्यवस्था दलतन्त्र कि गणतन्त्र ?’ विषयक विशेष अन्तरक्रिया कार्यक्रमलाई सम्बोधन गर्दै उनले अहिलेको सरकार र गठबन्धन दल भगौडा दलाल बर्गको संरक्षण गरिरहेको आरोप लगाए ।
अहिलेको सरकारले नेपालको पूँजी कसरी हुन्छ विदेशमा लैजाने बर्गको पक्षपोषणमा लागेको बताउदै थापामगरले मुलुकको आर्थिक अवस्था झनझन बिग्रदै गएको बताए । उनले मुलुकमा देखिएको अहिलेको सम्पूर्ण समस्याहरुको समाधान लुटकारी दलतन्त्रको अन्त्य हुनुपर्ने बताए ।
आजपाले आजै विराटनगरका साथै काठमाडौं, पोखरामा समेत अन्तरक्रिया कार्यक्रम गरेको छ । गणतन्त्रको सन्दर्भ पारेर आजपाले प्रमुख शहरमा अन्तरक्रिया कार्यक्रम गरेको हो । यस्तै अब नेपालगंज, जनकपुरमा समेत यस्तै अन्तरक्रिया कार्यक्रम आयोजना गर्न लागेको आजपा नेता त्रिभुवन साहले जनाएका छन् ।
विराटनगरमा आजपा कोशी प्रदेशका अध्यक्ष जुडिलाल मोचीको अध्यक्षतामा भएको कार्यक्रममा थापामगरका साथै क्रान्तिकारी कम्युनिष्ट पार्टीका नेता विमल निरौला, नेसपा नयाँ शक्तिका नेता नवराज दाहाल, नेकपा कोशी प्रदेशका अध्यक्ष सतिलाल थारु, बैंक ऋणी पीडित संघका सुशिल सापकोटा, मजदुर नेता खगेन्द्र भण्डारी, लघुवित पीडित संघर्ष समितिका अध्यक्ष गायत्री राई, आजपा नेताहरु अशोक शर्मा, भनु कौराल लगायतकाले सम्बोधन गरेका थिए ।
यसैगरी पोखरामा आजै आजपा गण्डकी प्रदेशको आयोजनामा ‘वर्तमान व्यवस्था दलतन्त्र कि गणतन्त्र ?’ विषयक विशेष अन्तरक्रिया कार्यक्रम सम्पन्न भएको छ । आजपा गण्डकी प्रदेशका अध्यक्ष भोजराज त्रिपाठीको अध्यक्षतामा भएको कार्यक्रममा आजपा केन्द्रीय कार्यालय सदस्य एवं वागमती प्रदेशका इन्चार्ज ज्ञानेन्द्र तामाङ लगायतका नेताहरुको सहभागिता रहेको थियो ।
विराटनगर, पोखरा जस्तै काठमाडौंमा समेत आजपा अध्यक्ष प्रभु साहको विशेष सहभागितामा अन्तरक्रिया कार्यक्रम सम्पन्न भएको छ ।
