काठमाडौं । पूर्वराष्ट्रपति विद्यादेवी भण्डारीले ऐतिहासिक राजनीतिक उपलब्धिको रक्षा, प्रयोग र विकास गर्दै अघि बढ्न्ुपर्ने बताउनुभएको छ ।
गणतन्त्र दिवसका अवसरमा आज शुभकामना सन्देश जारी गर्दै पूर्वराष्ट्रपति भण्डारीले गणतान्त्रिक मूल्य, मान्यता र आदर्शहरुलाई सदा कायम राखिरहन आ–आफ्नो स्थानबाट भूमिका निर्वाह गर्न आह्वान गर्नुभएको हो ।
पूर्वराष्ट्रपति भण्डारीले शुभकामना सन्देशमा भन्नुभएको छ,– ‘गणतन्त्र नेपाली जनताको लामो र कठोर संघर्षको मूर्त रूप हो । यस ऐतिहासिक राजनीतिक उपलब्धिको रक्षा, प्रयोग र विकास गर्दै समुन्नत नेपाल बनाउने हामी सबैको साझा दायित्व हो ।’
उहाँले राजनीतिक परिवर्तनले मुलुकको सामाजिक–आर्थिक विकासलाई तिव्रता दिन मार्ग प्रशस्त गरेको छ बताउनुभएको छ । यसले हौसला प्रदान गरेको उहाँकोभ नाइ छ । ‘शिक्षा, स्वास्थ्य, सूचना प्रविधि र पूर्वाधारको विकासमा एक स्तरका उपलब्धीहरू हासिल भएका छन् । अनि आफ्नो देशको विकास आफै गर्नु पर्दछ भन्ने भावना विस्तारित र दरिलो बनिरहेको छ’ उहाँले भन्नुभएको छ– ‘मुलुकको आर्थिक विकासको लागि हाम्रो प्रयासलाई थप सघन र उपलब्धिमूलक बनाउन सकेको खण्डमा समृद्धिका निम्ति जनताको आकाङ्क्षालाई साकार तुल्याउन सकिनेछ । त्यसैले, आर्थिक रूपले सुसम्पन्न नेपाल बनाउने महाअभियानलाई सार्थक तुल्याउने दिशामा नेपाल सरकार, सम्पूर्ण राजनीतिक दल र सम्बद्ध सबैलाई गणतन्त्र दिवसले प्रेरणा प्रदान गर्नेछ भन्ने मैले विश्वास लिएको छु ।’
