कोरोना महामारीको प्रभावकारी व्यवस्थापनको माग गर्दै अनशनरत  ‘इनफ इज इनफ’ अभियानसम्बद्ध युवाहरूप्रति साझा पार्टीले ऐक्यबद्धता जनाएको छ । अभियानसम्बद्ध युवाहरू बिगत ६ दिनदेखि दोस्रो पटक अनशन बसिरहेका छन्। केही हप्ताअघि पीसीआर टेस्ट बढाउनु पर्ने, क्वारेन्टिन सुधार गर्नुपर्ने, अग्र पङ्क्तिमा खटिएका स्वास्थ्यकर्मीहरूको सुरक्षाप्रति संवेदनशील रहनुपर्ने लगायतका कयौँ जायज मागहरू राख्दै दुईजना युवाहरू ईः र पुकार बम १२ दिनसम्म अनशन बसेका थिए। सरकारले ती मागहरू पुरा गर्ने प्रतिबद्धता जनाएपछि उनीहरूले अनशन तोडेका थिए।

तर सरकारको प्रतिबद्धतामा कुनै प्रगति नभएको भन्दै सरकारमाथि दबाब सृजना गर्न ईः, करण गुरूङ र समाइरा श्रेष्ठले पुनः सत्याग्रह सुरू गरेका छन्। सहप्रवक्ता शरदराज पाठकले एक विज्ञप्ति जारी गर्दै भनेका छन्, ‘सरकारले आम सर्वसाधारणको मागविना आफै गर्न पर्ने कामहरू गराउनका लागि युवाहरूले आफ्नो ज्यान जोखिममा राखेका छन्। तर सत्तारूढ दलका जिम्मेवार नेताहरू शक्ति संघर्षको घिनलाग्दो राजनीतिक खेलमा अहोरात्र व्यस्त छन्। देश र जनताप्रति उनीहरूको कुनै संवेदनशीलता देखिँदैन।’

संक्रमणको जोखिम कायमै रहेको अवस्थामा अनशनरत युवाहरूसँग भएको सहमति लागू नगर्नु अपराध भएको साझाले जनाएको छ । ‘सरकारी बेवास्ताले अनसनकारी युवाको स्वास्थ्यमा दीर्घकालीन असर परे वा उनीहरूको जीवन तलमाथि भए, त्यसबाट उत्पन्न हुने परिस्थितिको सम्पूर्ण दोष प्रधानमन्त्री ओली स्वयंले लिनुपर्नेछ,’ विज्ञप्तिमा भनिएको छ । पार्टीले अनशनरत युवाहरूप्रति देश–विदेशका सम्पूर्ण नेपालीलाई जहाँबाट जसरी सकिन्छ ऐक्यवद्धता प्रकट गर्न आग्रह पनि गरेको छ।