काठमाडौं । सरकार र २५ दिनदेखि आन्दोलनरत सामुदायिक विद्यालयका शिक्षकबीच आज वार्ता हुने भएको छ । शिक्षा मन्त्रालयमा बिहान ८ बजेपछि वार्ता हुने छ । यसअघि हिजो हुने भनिएको छलफल सरकार र शिक्षकबीच समन्वय अभाव हुँदा भएको थिएन ।
शिक्षा, विज्ञान तथा प्रविधि मन्त्रालयका सहसचिव युवराज पौडेलले विज्ञप्ति जारी गरी आज शिक्षकहरुसँग वार्ता गर्न लागिएको जानकारी दिएका छन् । विज्ञप्तिमा वार्ता र संवादका माध्यमबाट आन्दोलनरत शिक्षकका समस्या समाधान गर्न शिक्षामन्त्री रघुजी पन्तले आह्वान गरेको उल्लेख गरेको छ ।
यसअघि हिजो दिउँसो ३ बजे हुने भनिएको बार्ता अन्तिम समयमा आएर भाँडिएको थियो । आन्दोलनरत शिक्षक महासंघलाई नसोधी सिंहदरबार गेटमा २५ जनाको नाम मन्त्रालयले पठाएको भन्दै शिक्षकहरू बार्ता नगरी फर्किएका थिए ।
मन्त्रालय आफैँले शिक्षकहरूको बार्ता टोली बनाएर सिंहदरबार प्रवेशको अनुमति नदिएको भन्दै आक्रोशित शिक्षकहरू सिंहदरबार गेटबाट फर्किए पछि हिजो हुने भनिएको बार्ता भाँडिन पुगेको थियो । तर, शिक्षक महासंघले पठाउने आधिकारिक टोलीसँग मन्त्रालयले वार्ता गर्न तयार भए पछि आज बिहान बार्ता हुन लागेको हो ।
विद्यालय शिक्षा ऐन जारी हुनुपर्ने माग राख्दै नेपाल शिक्षक महासंघ २५ दिनदेखि शैक्षिक हड्ताल सहित काठमाडौं केन्द्रित सडक आन्दोलन गर्दै आएको छ ।
शिक्षकहरुका आन्दोलनका कारण लाखौं विद्यार्थीको पठनपाठन अबरुद्ध भएको छ । कक्षा १२ को परीक्षा सारिएको छ । एसईईको उत्तर पुस्तिका परीक्षण हुन सकेको छैन । शैक्षिक सत्र सुरु भइसक्दा पनि विद्यालयहरु नखुल्दा पठाउन प्रभावित भएको छ । विद्यार्थी भर्नासमेत प्रभावित छ ।
त्यसो त सर्वोच्च अदालतले बिहीबार शिक्षकका संविधानसम्मत माग पूरा गरेर तीन दिनभित्र विद्यालय फर्काउने वातावरण बनाउन सरकारलाई आदेश दिएको छ । यसले पनि सरकार र शिक्षकबीचको वार्ता केही सकारात्मक हुने अपेक्षा गरिएको छ ।
