काठमाडौँ । धनुषामा विष सेवनबाट तीन बालबालिकाको ज्यान गएको छ भने एक जनाको अवस्था गम्भीर रहेको छ ।
धनुषाको शहीदनगर नगरपालिका–५ यदुकोहाका सुशील साहका ६ वर्षीय छोरा आदित्य साह, ४ वर्षीया छोरी आकृति साह र २ वर्षीया आरुसी साहको मृत्यु भएको हो ।
प्रहरीका अनुसार सुशीलकी श्रीमती ३० वर्षीया पविता साहको अवस्था गम्भीर छ । उनको प्रादेशिक अस्पतालको भेन्टिलेटरमा उपचार भइरहेको छ ।
सोमबार साँझ पौने सात बजेको समयमा घरमै आमासहित सन्तानहरु विष सेवन गरेको अवस्थामा फेला परेका थिए ।
स्थानीयले तत्कालै उपचारको लागि प्रादेशिक अस्पताल जनकपुरमा पठाएको भएपनि अस्पताल लैजाँदा तीनैजनाको मृत्यु भइसकेको थियो ।
प्रहरीले खबर पाउनासाथ घटनाबारे अनुसन्धान गरिरहेको जनाएको छ ।
घरायसी विवादमा पविताले तीनै छोराछोरीलाई विष सेवन गराई हत्या गरेको र आफू स्वयं पनि विष सेवन गरी आत्महत्याको प्रयास गरेको हुन सक्ने प्रहरीको आशंका छ ।
