काठमाडौँ । काठमाडौँ महानगरपालिकाका उपप्रमुख सुनिता डंगोलले बजार अनुगमनका क्रममा सुधारको मौका प्रदान गरिएका व्यवसायीले तोकिएको समयमा मापदण्ड पुरा नगरे कानुनी कारवाही गरिने बताएकी छिन् । अनुगमनमा खटिएका अधिकारीहरुसँग कुरा गर्दै उपप्रमुख डंगोलले यस्तो बताएकी हुन् ।
उपप्रमुख डंगोलले कृषि तथा पशुपन्छी विभागका प्रमुख एवं निमित्त प्रमुख प्रशासकीय अधिकृत नुरनिधि न्यौपाने, खाद्य स्वच्छता तथा गुणस्तर कार्यक्रमका विज्ञ सल्लाहकार जीवनप्रभा लामा, कार्यक्रमका सल्लाहकार सन्तोष गिरीसहित अनुगमनमा खटिएका अधिकारीहरुसँग छलफल गरकी थिईन् ।
महानगरपालिकाले अनुगमनका क्रममा बजारबाट विक्री गरिने खाद्य सेवाका बस्तुको ढुवानी, भण्डारण, प्रशोधन, खाद्य बस्तुको उत्पादन, पकाइएको खानेकुराको भण्डारण, भण्डारणको अवधि र विधि, व्यवसायका सही र गलत प्रयोग, गलत प्रयोगबाट हुने नोक्सानी, खानेकुरा सुरक्षाका जोखिम, प्रदूषणको रोकथाम, स्वच्छता र सरसफाइमा तोकिएका मापदण्ड पूरा गर्न प्रोत्साहन गर्दै आईरहेको छ ।
यस्तै खाद्यान्न (दाल, चामल, तरकारी, फलफुल, विस्कुट, चाउचाउ, भुजिया) जस्ता खाद्यान्नको उत्पादन मिति, उपभोग्य मिति, म्याद सकिएको सामग्री राख्ने छुट्टै कक्षको व्यवस्थालगायत स्वच्छ बजारका लागि सिप सिकाउदै आईरहेको छ ।
