काठमाडौं । नेपाल सरकारको मुख्य सचिवमा वर्तमान परराष्ट्र सचिव शंकरदाश वैरागीको पक्का भएको छ । उनी गएको चार वर्षदेखि परराष्ट्र मन्त्रालयको सचिव पदमा कार्यरत छन् । हाल मुख्यसचिवको दौडमा लागेका तीन जना वरिष्ठ सचिवहरुमध्ये उनी पनि वरिष्ठमा पर्दछन् । यस दौडमा उनीसहित मोहनकृष्ण सापकोटा र केदारबहादुर अधिकारी पनि लागेका थिए । तर बाजी मार्नेमा वैरागी अघि देखिएका छन् । उनको नियुक्ति पक्काजस्तै भएको सत्तारुढ दलको एक समाचार स्रोतले बतायो ।

त्यसैगरी हालका मुख्यसचिव लोकदर्शन रेग्मीलाई भने बेलायतको राजदूतमा पठाइने भएको छ । उनको कार्यकाल आगामी कात्तिकको पहिलो हप्ता नै सकिन लागेको छ । कार्यकाल सकिनु अगावै उनलाई १५ दिन अगाडि राजीनामा गर्न लगाइने छ । त्यसपछि मात्र वैरागीलाई बाटो खुल्ने । सोही कारण उनलाई मनाउन बेलायतको राजदूतका लागि अफर गरिएको समाचार स्रोतको दाबी छ । बेलायतका राजदूत दुबसु क्षेत्रीको कार्यकाल सकिन लागेको छ । उनी परराष्ट्र मन्त्रालयको कोटाबाट राजदूत बनेका हुन् । उनी त्यहीँका कर्मचारी भएकोले सरकारले चाहेमा केही समय अगावै पनि फिर्ता बोलाउन सक्छ । 

यसैगरी सत्तारुढ नेकपाको समाचार सुत्रले बताएअनुसार प्रधानमन्त्री केपी ओलीलाई मन्त्रिमण्डल पुनर्गगठनको काम निकै सकसपूर्ण भएको पाइएको छ । सुत्रका अनुसार नेकपाका अर्का अध्यक्ष प्रचण्डले पूर्व माओवादीको कोटाबाट हाल मन्त्रिमण्डलमा रहेका सबैजनालाई फिर्ता बोलाएर नयाँ नेताहरुलाई पठाउन खोजेका छन् भने प्रधानमन्त्री ओली भने दुई मन्त्री रामबहादुर थापा र लेखराज भट्टलाई फिर्ता नगर्ने पक्षमा छन् । अघिल्लो महिना नेकपाको विवाद चरम उत्कर्षमा पुगेका बेला यी दुई मन्त्रीले ओलीलाई साथ दिएर यदि पार्टी फुट्यो भने आफूहरु प्रचण्डतिर नजाने अडान लिएका थिए । यसकारण पनि प्रचण्डलाई पार्टी फुटाउन समस्या भएको थियो ।

प्रधानमन्त्री ओलीले मन्त्री विना मगरलाई बर्खास्त गर्न खोजेका छन् तर यसमा प्रचण्डको सहमति छैन । मगर प्रचण्डकी बुहारी हुन् । यता प्रचण्डले यसपालि मन्त्री बनाउनै पर्नेमा जनार्दनन शर्मा, नारायणकाजी श्रेष्ठ र पम्फा भुसाल रहेका छन् । जनार्दन शर्माले गृहमन्त्री दाबी गरिरहेका छन् भने उता ओलीले बादललाई फिर्ता बोलाउन चाहेका छैनन् । शर्माले भने यति ठूलो पार्टीमा सबैले पालो पुराएर मन्त्री खान पाउनुपर्ने र हालका मन्त्रीले आधा कार्यकाल खाइसकेकाले अब सबैलाई निकालेर नयाँ सेट पठाउनुपर्ने भन्दै प्रचण्डलाई दबाब दिँदै आएका छन् ।

यता यस्तो छ भने अर्कातर्फ प्रधानमन्त्रीलाई अर्थमन्त्रीका कारण पनि गाह्रो भएको छ । अर्थ ताक्नेमा बामदेवदेखि इश्वर पोखरेल पनि छन् । यता माधव नेपालको गुट मिलाउनका लागि सुरेन्द्र पाण्डेलाई पनि अर्थको जिम्मेवारी दिनुपर्ने पनि कतिपयको दबाब ओलीलाई छ । त्यसैले अहिलेका लागि प्रधानमन्त्री ओलीले निकालेको निकास मध्यममार्गी छ । हालका लागि विवादबाट पञ्छिन उनले अर्थ राज्यमन्त्रीमा डा.बिमला राई पौडेललाई ल्याउने तयारी गरेका छन् । हाललाई मन्त्रिपरिषदको बैठकमा सहभागी हुन पाउनेगरी बिमलालाई राज्यमन्त्री बनाउने निष्कर्षमा पुगेका प्रधानमन्त्रीले यसैकारण पनि आफ्नो प्रमुख आर्थिक सल्लाहकारमा डा.युवराज खतिवडालाई नियुक्त गरेको बताइएको छ ।

अर्कातर्फ बामदेवले आफूलाई गृह या अर्थमन्त्री दिनुपर्ने अडानबाट पछि हटाउन प्रधानमन्त्री ओलीले उनकी श्रीमती तुलसा थापालाई महिला बालबालिका मन्त्री बनाउने अफर गरेका छन् । थापा पनि सांसद छिन् । हालका महिला बालबालिका मन्त्री पार्वत गुरुङलाई पर्यटनमा र पर्यटन मन्त्री योगेश भट्टराईलाई सञ्चार मन्त्रालयमा पठाउने तयारीमा प्रधानमन्त्री ओली लागेका बुझिएको छ । यसरी मन्त्रिपरिषद पुनर्गठनमा समस्या उत्पन्न भएपछि आपूm तत्कालका लागि बच्ने बाटो प्रधानमन्त्री ओलीले यसरी निकालेको नेकपा स्रोतले नै बताएको छ ।