काठमाडौं । तत्कालीन विद्रोही नेकपा माओवादीले हत्या गरेका मुक्तिनाथ अधिकारीको २३ औं स्मृति दिवस मनाइएको छ । लमजुङको सुन्दरबजार नगरपालिकाको पाणिनी संस्कृत माध्यमिक विद्यालयमा स्वर्गीय अधिकारीको सम्झना गर्दै स्मृति दिवस मनाइएको हो ।
पाणिनी संस्कृत माध्यमिक विद्यालयका तत्कालिन प्रधानाध्यापक मुक्तिनाथ अधिकारीलाई २०५८ साल माघ ३ गतेका दिन कक्षाकोठामा पढाइरहेको अवस्थामा आँखामा पट्टी बाधेर लगि केहि समयपछि निर्ममतापूर्वक हत्या गरिएको थियो । अधिकारीलाई तत्कालिन नेकपा माओबादी कार्यकर्ताको समूहले च्यानपाटा माथि थुम्कोमा रुखमा बाधेर निर्ममतापूर्वक छुरी रोप्दै टाउकोमा गोली प्रहार गरी हत्या गरेका थिए । एमनेष्टि इन्टरनेसनल समूह ७९ का संयोजक समेत रहेका अधिकारीलाई चन्दा दिन इन्कार गरेको भन्दै हत्या गरेको माओबादीले बताएको थियो ।
सोही दिनको सम्झनामा पाणिनी संस्कृत माध्यमिक विद्यालयमा प्रत्येक बर्ष स्मृति दिवस कार्यक्रमको आयोजना गर्ने गरिन्छ ।
विहिबार भएको २३औं स्मृति दिवस कार्यक्रमका सुन्दरबजार नगरपालिकाका नगर प्रमुख कृष्णप्रसाद कोइरालाले दुराडाँडाका एउटा नक्षत्र अन्त्य गरिएको दिनको रुपमा स्मरण गर्दै समाजलाई आतंकित बनाउने उद्देश्यका साथ उक्त कार्य गरेको बताए ।
उनलेसत्ता प्राप्तिको लागि भन्दै माओबादीले गरेको आतंककारी क्रियाकलापलाई अन्त्य गर्न तत्कालिन अवस्थामा नेपाली काँग्रेसका सभापति गिरीजाप्रसाद कोइरालाले माओबादीसँग वार्ता गर्न गरेको पहलकदमीको समेत स्मरण गरे ।
मुक्तिनाथ अधिकारीको घटना एउटा प्रतिनिधिमूलक घटना भएको भन्दै देशभर भएका यस्ता घटनामा संलग्न दोषीलाई कार्वाही र पिडितलाई न्याय दिन बनेका सत्य निरुपण लगायतका आयोगहरुले काम गर्न नसकेको भन्दै गणतन्त्र स्थापनापछि पनि यस्ता समस्याहरु बल्झिरहेको उनले बताए । सत्यतथ्य अध्ययन गरी वास्तविक व्यक्तिलाई सहिद घोषणा नगरिंदा शहीदको नाममा लामो सूची बनेको उनको भनाइ छ ।
कार्यक्रममा नगर उपप्रमुख भवानी केसीले मुक्तिनाथ स्मृति पार्क बनाउने कामसँगै मुक्तिनाथ जस्ता व्यक्ति उत्पादन गर्नुपर्ने बताइन् । सबै जात, धर्म र बर्गमाथि भेदभाव नगरी समान किसिमको समाज बनाउने व्यक्तिको खाँचो आजपनि रहेको उपप्रमुख केसीको भनाई थियो ।
मानवअधिकारकर्मी चरण प्रसाईले सत्य निरुपण हुनुपर्ने भन्दै वास्तविक पिडितहरुको छानविन गर्न सरकार असक्षम भएको बताए । प्रसाईले अवका दिनमा स्थानीय तहमा हुने न्यायिक समिति मार्फत नै त्यस्ता घटनाको पहिचान गरी सरकारलाई घच्घच्याउने काम गर्नुपर्ने धारणा राखे ।
एमनेष्टि इन्टरनेशनल नेपालका अध्यक्ष विपिन बु्ढाथोकीले शान्ति सम्झौता भएको लामो समयसम्म पनि मानवअधिकारकर्मी र सामाजिक व्यक्तिहरुमाथि भएको हत्या हिंसा लगायतका घटना जस्ता संक्रमणकालिन न्यायसँग सम्बन्धित मुद्धालाई नटुंग्याएर सरकार उदासिन भएको बताए ।
कार्यक्रममा मुक्तिनाथ अधिकारीको स्मृतिमा माध्यमिक विद्यालय स्तरीय कविता प्रतियोगिताको समेत आयोजना गरिएको थियो । प्रतियोगितामा सर्बोदय माध्यमिक विद्यालयकी आयुषा केसी प्रथम, संस्कृति सदन माध्यमिक विद्यालयकी सुजिना भूजेल द्वितीय, पाणिनी संस्कृत माध्यमिक विद्यालयका आशिष भट्ट तृतीय र सरस्वति सदन माध्यमिक विद्यालयकी रञ्जिता वि.क.ले सान्त्वना स्थान प्राप्त गरेका थिए ।
