भारतीय चलचित्र उद्योगका सुप्रसिद्ध गायक एसपी बाला सुब्रमण्यमको गएको शुक्रबार अपराह्न निधन भएको छ । अद्भूत स्वरका धनी सुब्रमण्यमको कोरोनाभाइरसको संक्रमणबाट ७४ वर्षको उमेरमा निधन भएको भारतीय संचार माध्यमहरुले जनाएका छन् । उनी उपचाररत चेन्नाईको एमजीएम हेल्थकेएर अस्पतालले आइतबार नै एसपिबिको स्वास्थ्य नाजूक रहेको भन्दै विज्ञप्ति जारी गरेको थियो । उनलाई गत अगष्ट ५ मा अस्पताल भर्ना गरिएको थियो । केही दिनअघि मात्र एउटा भिडियो सन्देश जारी गर्दै उनले आफूलाई खासै केही नभएको र स्वास्थ्य सुधारोन्मुख रहेको बताएका थिए ।
दक्षिण भारतीय आन्ध्र प्रदेशको तेलगु ब्राह्मण परिवारमा जन्मिएका एसपिबीलाई भारतीय चलचित्र उद्योगमा निकै भद्र, प्रतिबद्ध र बौद्धिक व्यक्तित्वका रुपमा समेत लिइन्छ । उनका छोरा एस.पी. चिरन दक्षिण भारतीय चलचित्र उद्योगमा निकै चर्चित गायक, नायक र उत्पादक मानिन्छ ।
सल्मान खानको आवाजका रुपमा परिचित थिए बाला
बाला सुब्रमण्यमलाई सलमान खानको आवाजको रुपमा पनि चिनिन्थ्यो । सलमानले खेलेका कैयौं फिल्ममा उनले गाएका गीत सुपर हिट भएका थिए । आइतबार स्वास्थ्य स्थिति नाजूक भएसँगै सलमानले चाँडै ठीक हुने अपेक्षा गर्दै ईश्वरसँग प्रार्थना गरेका थिए ।
अवार्ड
एसपी बाला सुब्रमण्यमले १६ विभिन्न भाषामा लगभग ४० हजार गीत गाएका थिए । उनले सन् २००१ मा पद्म श्री र २०११ मा पद्मभूषण सहित कैयौं पुरस्कार र सम्मान प्राप्त गरेका थिए । उनले पहिलो हिन्दी चलचित्र “एक दूजे के लिए” (१९८१) का लागि पहिलो पटक गीत गाएका थिए । यस चलचित्रका लागि उनले बेस्ट मेल प्लेब्याक सिंगरको राष्ट्रिय फिल्म अवार्ड प्राप्त गरेका थिए ।
उनले “मैने प्यार किया” फिल्ममा सलमान खानका लागि गीत गाएका थिए, जसमा सबै गीत सुपर हिट बन्नुका साथै हर युवायुवतीका लागि ढुकढुकी बन्न सफल भए । यो फिल्म ब्लकबस्टर हुनुका साथै यसका गीतहरु आज पनि उत्तिकै सुन्ने गरिन्छ ।
“आया मौसम दोस्ती का”, “हम बने तुम बने”, “मैने प्यार किया”, “हम आपके है कौन” “सुक्रिया मेहेरबानी”, जस्ता चर्चित गीतमा उनले लता मंगेसकरसँग मिलेर गीत गाएका छन् ।
अरु अनगिन्ती हिन्दी गीतमा उनको स्वरको निखार सुन्न पाइन्छ । जस्तै, “बहुत प्यार करेत हैं”, “साथियाँ तुने क्या किया”, “दिवानी दिवानी”, “देखा है पहली बार” ।
