काठमाडौं । चितवन राइनोजका ब्याटर रवि बोपारा नेपाल प्रिमियर लिगमा हालसम्म सर्वाधिक रन बनाउने ब्याटर बनेका छन् ।
लुम्बिनी लायन्सका कप्तान रोहित पौडेललाई पछि पार्दै उनी पहिलो स्थानमा उक्लिएका हुन् ।
जारी एनपीएलमा आठ खेल खेलेका बोपाराले कुल दुई सय ८६ रन बनाएका छन् । इलिमिनेटर खेलमा कर्णाली याक्सविरुद्ध अर्धसतक प्रहार गर्दै बोपारा पहिलो स्थानमा पुगेका हुन् । बोपारा ३४ बलमा ५३ रन बनाएर आउट भए । उनले ४ छक्का र ३ चौका प्रहार थिए ।
सर्वाधिक रन बनाउने ब्याट्सम्यानको सूचीमा दोस्रो स्थानमा रहेका रोहितले भने सात खेल खेल्दै कुल दुई सय ७९ रन बनाएका छन् । रोहितको टीम लुम्बिनी र चितवन दुबै प्रतियोगिताबाट बाहिरिसकेको छ ।
पोखरा एभेन्जर्सका आन्द्रेस गौस तेस्रो स्थानमा छन् । उनले ६ खेल खेल्दै कुल दुई सय २४ रन बनाएका छन् । चौथो स्थानमा रहेका कुशल मल्लले आठ खेल खेल्दै कुल दुई सय २३ रन बनाएका छन् ।
