काठमाडौं । प्रधानमन्त्री केपी शर्मा ओली अर्काे हप्ता चीन भ्रमणमा जाँदैछन् । उनी आगामी सोमबार चार दिने चीन भ्रमणका लागि जाने तयारी भइरहेको छ । यही भ्रमणकै तयारीस्वरुप परराष्ट्रमन्त्री डा आरजु राणा देउवा यतिखेर चीनमा छिन् ।
उनले यसै विषयमा आज चिनियाँ विदेशमन्त्री वाङयीसँग द्विपक्षीय भेटवार्ता गरेकि छिन् । आज उनले चीनको छन्दु सहरमा अपराह्न वार्ता गरेकि हुन् । सो भेटवार्तामा प्रधानमन्त्री ओलीको आसन्न चीन भ्रमणका क्रममा हुने सहयोग सम्झौता र यसमा बिआरआइमा के गर्ने भन्ने विषय समेत रहेको परराष्ट्र स्रोतले जनाएको छ ।
त्यसैले यहाँ पनि चर्चामा चीनको बिआरआइ परियोजना नै छ । यो परियोजनाको कार्यान्वयन सम्झौतामा हस्ताक्षर गर्ने कि नगर्ने भन्ने नै अहिलेको चर्चा छ । चीन सरकार नेपाललाई हस्ताक्षर गर्न प्रस्ताव गरेको छ भने नेपाल सरकारले भने यस विषयमा मतैक्यता निर्माण गर्न अझै सकेको छैन । भनिए, सुनिएअनुसार प्रधानमन्त्री सो प्लानमा हस्ताक्षर गर्न तयार छन् भने सत्ता सहयात्री अर्काे दल नेपाली काँग्रेस भने अनुदानमा मात्र त्यसमा हस्ताक्षर गर्नेमा अडिग रही आएको छ । त्यो के हुन्छ त भनेर आइतबारसम्म कुर्नुपर्नेछ । किनभने त्यतिञ्जेल सरकारले धारणा बनाउनै पर्नेहुन्छ ।
सोमबार प्रधानमन्त्री उत्तर यात्रामा निस्कने कार्यक्रम नै छ । विभिन्न दल, कार्यदल तथा कार्यदलका पनि उपकार्यदल बनाएर विभिन्न चरणमा बिआरआई परियोजनाको कार्यान्वयन सम्झौतामा छलफल भएको छ । त्यो छलफल जारी नै रहँदा यता प्रधानमन्त्री केपी ओलीले त्यसमाथि भोलि शनिबार अन्तिम छलफल हुने जनाइएको छ ।
कार्यदलले त विभिन्न छ ओटा परियोजना राखेर बिआरआइ अन्तर्गत चीन समक्ष प्रस्ताव गर्ने गरी तय गरेको छ । तर त्यसमाथि पनि भोलि प्रधानमन्त्री र काँग्रेस सभापति शेरबहादुर देउवा बसेर टुंग्याउने कुरा भएको छ । यसका लागि उहाँहरु शनिबार बस्नुहुने भएको छ । तर अर्काे एक समाचार स्रोत भन्छ यसमाथि नेपालले अर्काे नयाँ प्रस्ताव अर्थात फ्रेमवर्क बनाएको छ जसलाई आज परराष्टमन्त्री डा राणाले चिनियाँ विदेशमन्त्री समक्ष पेश गरेकी छिन् ।
चिनियाँ विदेशमन्त्रीले पनि यसलाई आफूले पनि माथिल्लो तहमा छलफल गर्ने जनाएका छन् । त्यो नयाँ प्रस्तावमा बिआरआइ स्वीकार गर्ने तर त्यो सबै परियोजना बेस रहने भनिएको छ । तर चीन भने यदि यसरी परियोजनाहरु सबै अनुदानमा नभएर कुन परियोजना अनुदान र कुन ऋणमा लिने भन्ने कुरा नेपालले फाइनल गरेर कुनै न कुनै परियोजना ऋणमा पनि लिनुपर्ने सुझाएको छ ।
यदि त्यसो भयो भने दुवैतर्फको विन विन पोजिसन हुनसक्ने बताइएको छ । उता यसै अन्तर्गत नै चीन सरकारले भने प्रधानमन्त्री ओलीको गृह जिल्ला झापामा एक र उता परराष्ट्र मन्त्री र काँग्रेस सभापति देउवाको गृहजिल्ला डडेल्धुरामा एक परियोजना दिने निर्णय चीनले गरेको छ ।
यताकै माग अनुसार झापामा एउटा परियोजना बन्ने भएको छ । त्यहाँको औद्योगिक मैत्रीपार्क पुरानै परियोजना रहेको र यसपालि एक खेल मैदान निर्माण परियोजना थपिने भएको हो । उता डडेल्धुरामा सिटीहलको निर्माण हुने भएको छ । यी दुई परियोजना यसपटक दुई नेताका लागि चीन सरकारले दिएको उपहारजस्तै बन्न पुगेको बताइएको छ ।
