काठमाडौं । प्रधानमन्त्री केपी शर्मा ओलीले भारतीय गुप्तचर संस्था रिसर्च एण्ड एनालाइसिस विङ (रअ) का प्रमुखलाई भेटेको खुलासा भएको छ । प्रधानमन्त्रीका प्रेस सल्लाहकार सूर्य थापाले रअका प्रमुख सामन्तकुमार गोयलबीच प्रधानमन्त्रीको भेटवार्ता भएको पुष्टि गरेका हुन् ।
बिहीबार सामाजिक सञ्जाल फेसबुकमा प्रेस नाेट राख्दै सल्लाहकार थापाले रअ प्रमुख भेटका लागि बुधबार बेलुका प्रधानमन्त्रीको सरकारी निवास बालुवाटार आउनु भएको र प्रधानमन्त्रीले नेपाल-भारतबीचको मैत्री सम्बन्ध खल्बलिन नदिने, समस्याहरूको वार्ताद्वारा समाधान गर्ने र पारस्परिक सहयोगलाई निरन्तर अगाडि बढाउने विषयमा आफ्नो धारणा राखेको जानकारी दिएका छन् । रअका प्रमुख गोयल नेतृत्वको ९ सदस्यीय टोली बुधबार नेपाल आएका थिए ।
यसैबीच, पूर्व प्रधानमन्त्री माधव कुमार नेपाल र पुष्पकमल दाहाल दुबैले रअका प्रमुखसँग भेटघाट नगरेकाे दाबी गरेका छन् । तर स्राेतहरूले दुबै नेताले रअ प्रमुखसँग भेटघाट र छलफल गरेकाे दाबी गरेका छन् ।
नेकपा अध्यक्ष समेत रहेका पुष्पकमल दाहाल प्रचण्डकाे सचिवालयले विज्ञप्ति नै जारी गरेर भारतीय गुप्तचर प्रमुख सामन्तकुमार गाेयलसँग भेटघाट नभएकाे जनाएकाे छ ।
प्रचण्डका प्रेस संयाेजक विष्णु प्रसाद सापकाेटाद्वारा जारी विज्ञप्तिमा संवेदनशील विषयमा झुट, कपाेलकल्पित र भ्रामक समाचार प्रति खेद प्रकट गर्दै आम जनसमुदाय र संचार जगतलाइ भ्रममा नपर्न आग्रह गरिएकाे उल्लेख छ ।
