काठमाडौं । नेपाली बजारमा विज्ञापन व्यवसायको व्यवस्थापन, प्रबर्द्धन, नियमन र वितरणको कार्य गर्ने गरी गठन हुन लागेको विज्ञापन बोर्डको सदस्यमा नियुक्तीका लागि रस्साकस्सी चलेको छ ।
हाललाई मन्त्रालयका सहसचिवको अध्यक्षतामा गठन हुने उक्त विज्ञापन बोर्डमा सदस्यका रुपमा संञ्चार उद्यमी महेन्द्र शेरचन, भाष्करराज कर्णिकार, नेपाल रिपब्लिक मिडिया प्रालिका निर्देशक शोभा ज्ञवाली, सञ्चारकर्मी भुषण दाहाललाई सदस्यमा नियुक्ती गर्ने तयारी भइरहेको उच्च स्रोतले बताएको छ ।
विज्ञापन नियमन गर्ने सम्बन्धमा व्यवस्था गर्न बनेको ऐन, २०७६ अनुसार वस्तु वा सेवाको बजार प्रबद्र्धन वा बिक्री, वितरण गर्न वा त्यस्तो वस्तु वा सेवाको प्रचार प्रसारको लागि गरिने विज्ञापन तथा तत्सम्बन्धी व्यवसायलाई नियमन गर्न उक्त ऐन ल्याइएको हो ।
ऐनमा विज्ञापनको नियमन सम्बन्धी काम गर्नका लागि विज्ञापन बोर्ड गठन हुने भनिएको छ । सरकारले क्लिन फिड लागू गरेसँगै यही कात्तिक ८ गतेदेखि यस्तो बोर्ड संचालन र परिचालन गर्नु पर्ने कानुनी व्यवस्था नै छ ।
ऐनमा नेपाल सरकारले नियुक्त गरेको व्यक्ति अध्यक्ष, गृह मन्त्रालयका सहसचिव सदस्य, उद्योग बाणिज्य तथा आपूर्ति मन्त्रालयका सहसचिव सदस्य, सञ्चार तथा सूचना प्रविधि मन्त्रालयका सहसचिव सदस्य, विज्ञापनदाता विज्ञापन एजेन्सी वा विज्ञापन प्रसारण र वितरण गर्ने संघसंस्थामध्ये मन्त्रालयले मनोनयन गरेका संस्थाका प्रतिनिधि दुई जना सदस्य, उपभोक्ता हक हितको क्षेत्रमा वा आमसंचारको क्षेत्रमा कम्तीमा दश वर्ष अनुभवप्राप्त व्यक्ति सदस्य रहने व्यवस्था छ ।
नेपालमा क्लिन फिड समेत नेपाल सरकार र संगठित संस्थाका विज्ञापन गरी झण्डै १७ अर्बको विज्ञापन रहेको अनुमान गरिएको छ ।
