काठमाडौं । आइसिसी पुरुष क्रिकेट विश्वकप लिग–२ शृङ्खलाको पहिलो खेलमा नेपाल अमेरिकासँग पराजित भएको छ ।
केहीबेरअघि सम्पन्न खेलमा नेपाल तीन विकेटले पराजित भएको हो ।
नेपालले दिएको २८७ रनको लक्ष्य अमेरिकाले ४९।४ ओभरमा २ बल बाकी छ्दा ७ विकेट गुमाएर पूरा गर्यो । उसका लागि शायन जहाङ्गिरले शतकिय पारी खेले । उनले ९७ बलमा १०४ रनको योगदान दिए ।
यस्तै कप्तान मोनाङ्क पटेलले ६२, हरमीत सिंहले ५७, शाड्ली भान स्कालकिकले अविजित २९ रन जोडे ।
बलिङतर्फ नेपालका कुशल भुर्तेलले ४, सोमपाल कामीले २ तथा ललित राजवंशीले १ विकेट लिए ।
त्यसअघि अमेरिकाको डालसस्थित ग्रान्ड प्रेरि स्टेडियममा टस हारेर पहिले ब्याटिङको निम्तो पाएको नेपालले निर्धारित ५० ओभरमा १० विकेट गुमाएर २८६ रन बनायो ।
नेपालका लागि कप्तान रोहित पौडलले शानदार प्रदर्शन गरेपनि नेपालको हार टार्न सकेनन् । उनले ७५ बलमा ९६ रन बनाए । सोही क्रममा उनले तीन छक्का र ८ चौका प्रहार गरे ।
नेपालका लागि अनिल साहले ६२ बलमा ५६ रन बनाए । उनले ५ चौका प्रहार गरे । यस्तै आशिफ शेखले ५३ बलमा ५२ रन बनाए । सो क्रममा उनले एक छक्का र ७ चौका प्रहार गरे ।
कुशल भुर्तेलले २८ बलमा ११ रन, आरिफ सेखले एक छक्का र दुई चौका प्रहार गर्दै ४५ बलमा ३७ रन बनाए । दीपेन्द्रसिंह ऐरीले १७ बलमा १३ रन, गुल्सन झाले ३ बलमा एक रन, सोमपाल कामीले चार बलमा दुई रन, सन्दीप लामिछानेले ११ बलमा ५ रन र करण केसीले तीन बलमा तीन रन बनाएर आउट भए ।
ललित राजवंशीले एक बलमा एक रन बनाए । अमेरिकाका लागि नोसथुस केन्जिगेले सर्वाधिक चार विकेट लिए । उनले ५२ रन खर्चिए । सौरभ नेत्रावलकरले ६३ रन खर्चिदैँ दुई विकेट लिए । जसदीप सिंह, हरमित सिंह र स्याड्ली भान श्यालवाएकले समान एकएक विकेट लिए । जसदीपले ६४ रन, हरमितले ४६ र स्याड्ली भान श्यालवाएकले ५७ रन खर्चिएका हुन् ।
नेपालले अतिरिक्त नौ रन पाएको हो । नेपालले दोस्रो खेल मङ्गलबार स्कटल्याण्डसँग खेल्नेछ । लिग–२ मा नेपालसहित क्यानडा, अमेरिका, नेदरल्याण्डस्, स्कटल्याण्ड, नामिबिया, ओमान र युनाइटेड अरब इमिरेट्स (युएई)सम्मिलित छन् ।
