काठमाडौं । भारतीय सेनापति मनोज मुकुन्द नरभाने नेपाल भ्रमणका लागि आज काठमाठौं आइपुग्दैछन् । उनको नेपाल आगमनको पूर्वसन्ध्यामा आज काठमाडौंको सुरक्षा व्यवस्था निकै कडा पारिएको छ । यसका लागि प्रहरीले ठूलो संख्यामा प्रहरी परिचालन गरेको छ र ठाउँ ठाउँमा चकजाँच बढाएको छ । महानगरीय प्रहरी कार्यालय, रानीपोखरीले नरभानेको भ्रमणको तयारीका लागि भन्दै चेकजाँच र शंकास्पद क्षेत्रमा निगरानी बढाएको हो ।
नेपाली सेना र नेपालस्थित भारतीय दूतावासका अधिकारीहरुको समन्वयमा सुरक्षा प्रबन्ध मिलाइएको बताइएको छ । तर सेनापतिको भ्रमणको समयमा सुरक्षाका दृष्टिले संवेदनशील अवस्था रहेको भन्दै काठमाडौं राजधानी उपत्यकाको सुरक्षा व्यवस्थालाई उच्च पारिएको एक उच्च सुरक्षा अधिकारीले बताए ।
तिहारको सुरक्षा व्यवस्थाको एक अलग्गै कार्यक्रम प्रहरीसँग रहेकोमा यही समयमा हुन लागेको नरभानेको भ्रमणलाई लक्षित गरेर पनि सुरक्षा व्यवस्था कडा पारिएको ती अधिकारीले बताए ।
सेनापतिको भ्रमणमा किन सुरक्षा व्यवस्था कडा ?
हुनत यो भ्रमण औपचारिक नै हो । नेपाल र भारतका सेना प्रमुखबीच एकअर्काको देशमा मानार्थ महारथीको दर्ज्यानी चिन्ह दिएर सम्मान गर्ने नेपाल र भारतको यो पुरानै परम्परा हो । तर पनि यस समय हुन लागेको सेनापति नरभानेको भ्रमाण भने सुरक्षाका दृष्टिले बढी संवेदनशील देखिएको छ । उनले नेपाल–भारत सीमा विवादमा दिएको विवादास्पद अभिव्यक्तिका कारण उनलाई सुरक्षा चुनौति रहेको सुरक्षा निकायको विश्लेषण छ ।
हाल नेपालल आफ्नो लिम्पियाधुरासहितको जमिन समेटेर नयाँ नक्सा जारी गरेको छ । यसको भारतीय पक्षले समर्थन गरेको छैन । यसै विषयमा सेनापति नरभानेले नेपालले यो मुद्धा आफै नभएर कसैको इसारामा उचालेको बताएका थिए ।
उनको यही अभिव्यक्तिका कारण उनको नेपालमा पनि व्यापक विरोध भएको थियो । भारतकै पनि कतिपय नागरिकले नरभाने एक सुरक्षा अधिकारीले दुई देशबीचको कूटनीतिक सम्बन्धलाई नाघेर प्रतिक्रिय दिएका भनी विरोध गरेका थिए ।
यसैबीचमा हालैमात्र उनको नेपाल भ्रमण हुन लागेपछि नेपालका विभिन्न समूहले उनको भ्रमण रद्द गर्न भनी माग पनि गरेका छन् । त्यसैले ती समूहरुहरुले कालो झण्डा देखाउन सक्ने, कफन बाँधेर बस्ने, कालो कपडा देखाउने र भिड जम्मा भएर विरोध प्रदर्शन हुनसक्ने विश्लेषण नेपालस्थित भारतीय दुतावासको पनि छ ।
त्यसैअनुसार प्रहरीले सम्भावित समूह र व्यक्तिमाथि निगरानी बढाएको छ र काठमाडौंको सुरक्षा व्यवस्था कडा पारेको छ । प्रहरीले कतिपय यस्ता समूह र व्यक्तिमाथि समेत निगराी बढाएको जनाएको छ ।
