काठमाडौँ । विश्वको सबैभन्दा ठूलो फुटबल लिग युइएफए च्याम्पियन्स लिग आज मंगलबारदेखि सुरु हुँदैछ । छ वर्ष भन्दा बढीको योजना, असफल प्रस्ताव र सुपर लिग सुरु गर्न असफल भएपछि च्याम्पियन्स लिग आजदेखि नयाँ ढाँचामा देख्न सकिनेछ ।
छ वर्ष भित्र, प्रमुख क्लबहरूले लिगको आयोजक, युरोपियन युनियन फुटबल एसोसिएसन (युइएफए)लाई परिवर्तन गर्न दबाब दिए, जसले युरोपेली फुटबलमा उथलपुथल ल्यायो ।
फलस्वरूप क्लबहरूले उनीहरूले चाहेको सबै कुरा पाए । धेरै टोलीहरू, धेरै खेलहरू र त्यो पनि बलियो प्रतिस्पर्धीहरूविरुद्ध, धेरै पैसा रहेको लिग अब देख्न सकिनेछ ।
अब ३२ टोलीको सट्टा ३६ टोलीको सहभागिता रहनेछ, जसमध्ये १८९ खेल हुनेछन् । गत सिजनसम्म १२५ खेल भएका थिए । प्रत्येक टोलीले ६ को सट्टा ८ खेल खेल्नेछ । त्यो पनि तीन विपक्षी विरुद्ध हैन आठ विपक्षी विरुद्ध । अर्को वर्ष मे ३१ मा म्युनिखको एलियान्ज एरिनामा च्याम्पियन्स लिगको विजेता पाइनेछ ।
युइएफएले ३६ क्लबका लागि २.८ बिलियन डलरको पुरस्कार राशि राखेको छ, जुन गत सिजनको तुलनामा २५ प्रतिशत बढी हो । विजेताले १७७ मिलियन डलर प्राप्त गर्ने अपेक्षा गरिएको छ ।
सहभागिताका लागि प्रत्येक टोलीले लगभग २ अर्ब ७५ करोड रुपैयाँ प्राप्त गर्नेछ । लिग चरणमा प्रति खेल जितअनुसार ३० करोड ३८ लाख र ड्रमा १० करोड ३९ लाख रुपैयाँ दिइनेछ ।
सबै ३६ टोलीहरू एकल लिग स्ट्यान्डिङमा शीर्षदेखि तलसम्म क्रमबद्ध छन्, जुन जनवरीमा समाप्त हुनेछ । जबकि यसअघि डिसेम्बरमा समूह चरणका खेलहरू सकिएका थिए । जनवरी सम्म लिग राउन्ड एकदम सरल छ । प्रत्येक टोलीले ८ खेल खेल्नुपर्नेछ, जसमा ४ घरेलु र ४ अवे रहेको छ । टोलीले जितको लागि तीन अंक र बराबरीमा एक अंक पाउनेछ । नकआउट राउण्डमा पुग्न अलि जटिल छ ।
युइएफएका अनुसार नकआउटको दौडमा रहनका लागि टोलीलाई बढीमा ८ अंक चाहिन्छ । जनवरी २९ मा तालिकाको शीर्ष–८ मा रहेका जुनसुकै टोलीहरू सीधै प्रि–क्वार्टरफाइनलका लागि छनोट हुनेछन्, जहाँ उनीहरूलाई १ देखि ८ सम्म सीड गरिनेछ । नवौंदेखि २४औं स्थानमा रहेका टोली फेब्रुअरीमा नकआउट प्लेअफ चरणमा प्रवेश गर्नेछन् । ९ देखि १६ सम्मको टोलीलाई वरियता दिइनेछ भने १७ देखि २४ सम्मको टोली वरियताविहीन हुनेछ । तालिकाको पुछारमा रहेका १२ टोली बाहिरिनेछन् ।
युरोपको यो एलिट फुटबल प्रतियोगितामा केही क्लब फर्किएका छन् भने केही पहिलो पटक खेलिरहेका छन् । इंग्लिस क्लब एस्टन भिल्ला ४१ वर्षपछि लिगमा फर्किएको छ । एस्टन भिल्ला सन् १९८१ मा विजेता बनेको थियो ।
इटालियन क्लब बोलोग्ना १९६४ युरोपियन कपपछि टूर्नामेंटमा फर्कदैछ । स्पेनिस क्लब जिरोना र फ्रान्सेली क्लब ब्रेस्ट पहिलो पटक लिग खेल्दैछन् ।
आजका खेलहरुः
युभेन्ट्स भर्सेस पिएसभी – २२ः३० बजे
योङ ब्वाइज भर्सेस एस्टन भिल्ला – २२ः३० बजे
रियल मड्रिड भर्सेस स्टुटगार्ट – ००ः४५ बजे
बायर्न म्युनिख भर्सेस डिनामो जाग्रेव – ००ः४५ बजे
स्पोर्टिङ भर्सेस लिल – ००ः४५ बजे
एसी मिलान भर्सेस लिभरपुल – ००ः४५ बजे
