एजेन्सी । बलिउड तथा साउथ अभिनेता आर माधवनले हालै पान मसाला ब्रान्डको समर्थन अस्वीकार गरेका छन् ।
यसका लागि कलाकारलाई ठुलो रकमको अफर आएको थियो । तर, दर्शकप्रतिको आफ्नो जिम्मेवारीलाई ध्यानमा राख्दै अभिनेताले यो प्रस्ताव अस्वीकार गरेका हुन् ।
दर्शकलाई हानि पुग्ने कुनै पनि ब्रान्डलाई प्रचार गर्न नचाहेको अभिनेताले बताए । स्रोतका अनुसार एउटा ठूलो पान मसाला कम्पनीले आफ्नो ब्राण्डको पहुँच बढाउने प्रयास गरिरहेको थियो । अब माधवनले अस्वीकार गरेपछि कम्पनीले ब्रान्डका लागि नयाँ अनुहार खोजिरहेको छ ।
केही समयअघि अभिनेता अजय देवगन, शाहरुख खान र अक्षय कुमार पान मसाला र गुटखा ब्राण्डको प्रचार गरेको भन्दै आलोचनामा परेका थिए । यसपछि अक्षयले यस्तो प्रमोशनमा सहभागी नहुने घोषणा गरेका थिए । उनले फ्यानसँग माफी पनि मागेका छन् ।
