काठमाडौँ । पेरिस पारालिम्पिक–२०२४ अन्तर्गत पहिलो खेलमा नेपालकी पलेशा गोबर्धनले जित निकालेकी छिन् ।
के–४४ क्याटगोरीको महिला ५७ केजीमुनिको राउन्ड अफ १६ को खेलमा पलेशाले भेनेन्जुएलाकी भलेरियाविरूद्ध शुक्रबार ३१–० को जित निकाल्दै अन्तिम आठमा स्थान बनाएकी हुन् ।
अब अन्तिम आठमा उनको भेट ब्राजिलकी सिल्भाना मायारासँग हुनेछ । प्रतिस्पर्धा आजै हुनेछ ।
यो स्पर्धामा ११ खेलाडी छन् । पलेशाले छनोट चरण पार गर्दै पेरिस पारालिम्पिकमा नेपालको प्रतिनिधित्व गरेकी हुन् । गत चैतमा चीनको ताइयानमा भएको पारालिम्पिकको एसियाली छनोट प्रतियोगितामा स्वर्ण जित्दै पेरिस पारालिम्पिकमा सहभागिता निश्चित गरेकी थिइन् ।
छनोट चरण पार गर्दै पारालिम्पिक खेल्ने पलेशा पहिलो नेपाली खेलाडी हुन् । पलेशा १९ औं एसियाली खेलकुदकी पनि ऐतिहासिक कास्य पदक विजेता हुन् ।
यसअघि तेक्वान्दोमै नेपालका भरतसिंह महरा पहिलो चरणमै पराजित भएका थिए । पेरिस पारालिम्पिकमा पलेशा र भरतसहित पौडीका भीमबहादुर कुमालले पनि प्रतिस्पर्धा गर्दै छन् । उनले पुरुष ५० मिटर फ्रिस्टायलमा सहभागिता जनाउने छन् ।
