काठमाडौँ । जर्मन सुपर कपको उपाधि लेभरकुसेनले जितेको छ । गएराति भएको फाइनल खेलमा स्टुटगार्टलाई पेनाल्टी सुटआउटमा ४–३ गोलले हराउँदै लेभरकुसेन च्याम्पियन बनेको हो ।
निर्धारित र थप समयसम्म खेल २–२ गोलको बराबरी भएपछि विजेताको टुंगो टाइब्रेकरबाट लागेको थियो ।
खेलको ११ औं मिनेटमा भिक्टर बोनीफेसले गोल गर्दै लेभरकुसेनलाई सुरुवाती अग्रता दिलाएका थिए । १५ औं मिनेटमा एन्जो मिलोटले गोल फर्काउँदै स्टुटगार्टलाई १–१ गोलको बराबरीमा ल्याए ।
यता, ६३ औं मिनेटमा डेनिज उन्डभले गोल गर्दै स्टुटगार्टलाई २–१ ले अघि बढाए । ८८ औं मिनेटमा प्याट्रिक सेसिकले गोल गर्दै लेभरकुसेनलाई २–२ गोलको बराबरी ल्याएका थिए ।
खेलको ३७ औं मिनेटमा मार्टिन टेरिअरले रातो कार्ड खाएपछि लेभरकुसेन १० खेलाडीमा समेटिएको थियो ।
