काठमाडौँ । राप्रपा नेपालले बंगलादेशमा जारी हिंसात्मक प्रदर्शनको क्रममा हिन्दुहरू माथि संगठित आक्रमण भइरहेको समाचारले विश्वभरका सनातन धर्मावलम्बीहरूलाई स्तब्ध बनाएको जनाएको छ ।
राप्रपा नेपालले एक वक्तव्य जारी गर्दै धार्मिक आस्थाको आधरमा गरिने हिंसाप्रति सचेत बिश्व समुदाय मौन रहन नसक्ने उल्लेख गरेको छ ।
‘बंगलादेशका जनताले बिभिन्न मागहरु राखेर गरेको आन्दोलनकाबारेमा हाम्रो भन्नु केही छैन । त्यो उनिहरुको अधिकार हो । तर, धार्मिक आस्थाको आधरमा गरिने हिंसाप्रति सचेत बिश्व समुदाय मौन रहन सक्दैन। आन्दोलनको बलमा सत्ता परिवर्तन भइसकेपछि पनि हिन्दूहरूमाथि अमानवीय र निर्मम आक्रमण हुनु तथा मन्दिरहरुमा तोडफोड गरिनु मानवअधिकारको ठाडो उल्लंघन हो ।’ विज्ञप्तीमा भनिएको छ ।
धार्मिक आस्थाको आधरमा भएका हिंसाको घोर भत्सर्ना र बिरोध गर्दै राप्रपाले मानवताविरुद्धको यस्ता घटनाप्रति नेपाल सरकारले कुनै प्रतिक्रिया नजनाउनु र मौन रहनु आश्चर्यजनक रहेको उल्लेख गरेको छ ।
‘हिन्दूहरूमाथि भइरहेको आक्रमण अन्त्य गर्न र पिडितहरुको उद्धार र सहयोगका निम्ति बंगलादेश सरकार र संयुक्त राष्ट्रसंघको ध्यानाकर्षण गर्न राप्रपा नेपाल सरकारसँग माग गर्दछ ।’ विज्ञप्तीमा भनिएको छ ।
