एजेन्सी । अफगानिस्तान क्रिकेट बोर्डले युवा ब्याट्सम्यान एहसानुल्लाह जनातलाई सबै क्रिकेट गतिविधिमा ५ वर्ष प्रतिबन्ध लगाएको छ ।
जनातमाथि म्याच फिक्सिङको आरोप लागेको थियो, जसलाई उनले स्वीकार गरेका थिए ।
जनात काबुल प्रिमियर लिगको दोस्रो संस्करणमा म्याच फिक्सिङको आरोपमा दोषी पाइएका थिए । अफगानिस्तानका खेलाडीले एसीबी र आईसीसीको भ्रष्टाचार विरोधी संहिता उल्लङ्घन गरेको आरोप स्वीकार गरेका छन् ।
२६ वर्षीय जनातले सन् २०१७ मा डेब्यु गरेका थिए । उनले अफगानिस्तानको तीन टेष्ट, १६ एकदिवसीय र एक टी–२० अन्तर्राष्ट्रिय खेलमा प्रतिनिधित्व गरेका थिए । जनातलाई एक प्रतिभाशाली क्रिकेटर मानिन्थ्यो, जसलाई सानै उमेरमा डेब्यु गरेको पनि भनिन्छ ।
एसीबीले जनातलाई दोषी पाएपछि बोर्डले अन्य तीन खेलाडीविरुद्ध म्याच फिक्सिङको अनुसन्धान थालेको बताएको छ ।
