एजेन्सी । बहुचर्चित रेणुकास्वामी हत्या प्रकरणमा नयाँ खुलासा भएको छ । घटनाको अनुसन्धान गरिरहेको कर्नाटक प्रहरीले उक्त घटनाका आरोपी कन्नड फिल्म स्टार दर्शन थुगुडेपाले कथित हत्यापछि धेरैसँग सम्पर्क गरेको बताएको छ ।
यसबाहेक घटनामा संलग्न अर्का अभियुक्तले मृतकलाई विद्युतीय झट्का दिएको स्वीकार गरेका छन् । प्रहरीका अनुसार दर्शनले कानुनी कारबाहीबाट बच्न र प्रमाण नष्ट गर्न साथीसँग ४० लाख रुपैयाँ लिएका थिए ।
दर्शनले आफ्ना साथी मोहन राजबाट ४० लाख रुपैयाँ लिएको स्वीकार गरेका छन् । दर्शनको घरबाट श्रीमतीलाई दिएको ३७.४ लाख र ३ लाख रुपैयाँ बरामद गरेको प्रहरीले जनाएको छ ।
प्रहरीले दर्शन र अन्य तीनलाई प्रहरी हिरासतमा राख्न र उनका साथी पवित्र गौडा र बाँकी अभियुक्तलाई न्यायिक हिरासतमा राख्न माग गर्दै बिहीबार अदालतमा हाजिर गरेको थियो । यस हत्याकाण्डमा दर्शन र गौडासहित १७ जनालाई आरोपी बनाइएको छ ।
प्रहरी स्रोतका अनुसार अभिनेताका फ्यान रेणुकास्वामीले गौडालाई अश्लील म्यासेज पठाएका थिए जसका कारण दर्शनले आक्रोशित भएर उनको हत्या गरेको कथित छ ।
उनको शव जुन ९ मा नाली नजिक फेला परेको थियो । अभिनेता र धनराज डी, विनय वी र प्रदोष लगायत अन्य अभियुक्तहरूले अनुसन्धानमा सहयोग नगरेको र तथ्य लुकाउन खोजेको पुलिसले अदालतलाई बताएको छ ।
चारैजनालाई अदालतले थप दुई दिन प्रहरी हिरासतमा राखेको छ । अब चारै जनालाई जुन २२ सम्म प्रहरी हिरासतमा राखिने छ भने बाँकीलाई न्यायिक हिरासतमा पठाइएको छ ।
प्रहरीका अनुसार अभियुक्त प्रदोषले प्रमाण नष्ट गर्नमा मुख्य भूमिका खेलेको र अनुसन्धानमा पनि सहयोग नगरेको बताएको छ । यसबारे थप अनुसन्धान हुनेछ । यसबाहेक प्रदोषमाथि मृतकसँगै अर्का आरोपी राघवेन्द्रको फोन पनि नालीमा फालेको आरोप छ, जुन अहिलेसम्म फेला परेको छैन ।
यससँगै प्रहरीले राघवेन्द्रको घरबाट ४ लाख ४० हजार रुपैयाँ र मृतकको सुनको औंठी र चेन पनि बरामद गरेको छ । मृतककी आमाले सुनको औंठी र चेन पहिचान गरेकी छन् । प्रहरी स्रोतका अनुसार चित्रदुर्गस्थित दर्शनको फ्यान क्लबमा कार्यरत मृतक रेणुकास्वामीलाई शेडमा ल्याएर यातना दिएको आरोप लगाइएको थियो, जसका कारण उनको मृत्यु भएको थियो ।
अधिकारीका अनुसार घटनास्थलबाट लठ्ठी, काठका टुक्रा, पानीको बोतल, रगतको दाग, सीसीटीभी फुटेजसहितको डीभीआर जस्ता सामान बरामद गरिएको छ ।
