मस्कोः नेपालमा कोभिड–१९ विरुद्धको खोप कहिले आइपुग्ला भन्ने अनुमान भइरहेका बेला रुसको विदेश मन्त्रालयले नेपाललाई २ करोड ५० लाख डोज खोप दिन आफू तयार रहेको जनाएको छ ।
रुसमा विकास गरिएको कोरोनाभाइरस विरुद्धको स्पुतनिक भी (SputniK V) खोप नेपाललाई उपलब्ध गराउन तयार रहेको रुसी विदेश मन्त्रालयको हवाला दिँदै रुसको रिया न्यूज एजेन्सीले जनाएको छ ।
स्वास्थ्य तथा जनसंख्या मन्त्री हृदयेश त्रिपाठीसँग नेपालका लागि रुसका राजदूतले केही दिनअघि मन्त्रालयमै भेटेर नेपाललाई रुसी खोप उपलब्ध गराउने बारे विचारविमर्श गरेका थिए ।
रूसी विदेश मन्त्रालयका एसिया विभागका निर्देशक जमिर काबुलाेभले नेपाल समेतका देशले रूसी खाेप लिने बारेमा ठूलै अभिरूचि देखाएकाे बताउनु भएकाे छ । उहाँले नेपालकाे एउटा फर्मास्यूटिकल कम्पनीसँग रसियन डाइरेक्ट इन्भेस्टमेन्ट फन्डले सहमति पत्रमा हस्ताक्षर गरेकाे जानकारी दिँदै साेही सहमति बमाेजिम नेपाललाइ २ कराेड ५० लाख डाेज खाेप उपलब्ध गराउन रूस तयार रहेकाे बताउनु भएकाे रूसकाे स्पुतनिक समाचार संस्थाले जनाएकाे छ ।
गत सेप्टेम्बरकाे अन्त्यतिर रसियन डाइरेक्ट इन्भेस्टमेन्ट फन्डले नेपाललाइ २ कराेड ५० लाख डाेज काेभिड विरूद्धकाे खाेप उपलब्ध गराउने घाेषणा गरेकाे थियाे । याे खाेपले नेपालकाे झण्डै ९० प्रतिशत जनसंख्यालाइ पुग्ने फन्डकाे भनाइ छ ।
यद्यपी यस खाेपका बारेमा नेपाल सरकारले केही बताएकाे छैन । नेपालले भारतीय कम्पनीसँग खाेपका बारेमा छलफल गरिरहेकाे र परराष्ट्र मन्त्री प्रदीप कुमार ज्ञवालीले भारत भ्रमणका क्रममा भारतीय खाेप नेपाल ल्याउने बारेमा विचार विमर्श गर्ने बताइएकाे छ ।
