काठमाडौं । नेपाली कांग्रेसले सरकार सहकारीका केही ठगहरूलाई जोगाउन संसदीय मूल्य मान्यता मास्न उद्धत रहेको निष्कर्ष निकालेको छ ।
संसद बैठकपछि बसेको कांग्रेस संसदीय दलको बैठकपछि बोल्दै प्रमुख सचेतक रमेश लेखकले सरकार पीडितलाई नभइ सहकारी ठगलाई जोगाउन उद्धत भएको बताए ।
उनले सदनमा कांग्रेसले बोल्न माग गर्दा पनि सत्तापक्षको दम्भको कारणले बोल्न नदिएको आरोप लगाए । सरकारले विपक्षीलाई बोल्न नदिएर आजै विश्वासको मत लिन जिद्दी नाटक गरेकोमा खेदजनक रहेको बताउदै उनले भने, ‘निर्बाध रूपले सदन सञ्चालन हुने अवस्था हुँदा हुँदै सरकारले बलमिचाइँ गर्यो। र, तानाशाही प्रवृत्ति देखायो। पर्याप्त समय हुँदा हुँदै पनि आज अवरुद्ध सदनको बीचमा बहुमत सिद्ध गर्ने नाटक गर्यो यो नेपालको संसदीय इतिहासमा नौलो र दुखदायी घटना मन्चन गरेको छ। यसले संसदीय मूल्य मान्यतालाई कमजोर पारेको छ।’
