बेइजिङ । बेइजिङमा विवादित खेलहरू सुरु हुन लागेको एक साताअघि चीनले बिहीबार शीतकालीन ओलम्पिकमा हस्तक्षेप नगर्न संयुक्त राज्य अमेरिकालाई चेतावनी दिएको छ।
शीतकालीन र ग्रीष्मकालीन खेलहरू दुवै आयोजना गर्ने पहिलो सहरका रूपमा बेइजिङले अर्को हप्ताको खेलकुद एक्स्ट्रावागान्जालाई सफ्ट पावर विजयमा परिणत गर्ने आशा राखेको छ।
तर चीनको मानवअधिकार रेकर्डले अमेरिकाको नेतृत्वमा रहेको कूटनीतिक बहिष्कारको कुराले कालो बादल छाएको छ । विशेषगरी सिनजियाङ क्षेत्रमा उइघुर मुस्लिम अल्पसङ्ख्यकप्रतिको उसको नीतिलाई वासिङ्टनले ‘नरसंहार’ भनेको छ ।
चीनका शीर्ष कूटनीतिज्ञ वाङ यीले आफ्ना अमेरिकी समकक्षी विदेशमन्त्री एन्टोनी ब्लिन्केनसँग कुराकानी गरेको विदेश मन्त्रालयले बिहीबार जारी गरेको विज्ञप्तिमा उल्लेख छ।
“अहिलेको सबैभन्दा जरुरी प्राथमिकता भनेको बेइजिङ शीतकालीन ओलम्पिकमा अमेरिकाले हस्तक्षेप गर्न बन्द गर्नु हो”, वाङले टेलिफोन कलमा भने ।
अमेरिकी सरकार र पाँच पश्चिमी देशका सांसदहरूले चीनको सिनजियाङ क्षेत्रमा उइघुरहरूप्रति गरेको व्यवहारलाई ‘नरसंहार’ घोषणा गरेका छन् । पछिल्लोपटक फ्रान्सको राष्ट्रियसभाले यस महिना त्यस्तो घोषणा गरेको छ ।
अधिकार अभियानकर्ताहरूले तिब्बतलगायत चीनमा हुने दुर्व्यवहार र हङकङमा अभिव्यक्ति स्वतन्त्रतामा जारी रोकावट हो भनी उनीहरूले भनेको कुरामा अन्तर्राष्ट्रिय ओलम्पिक समितिले आँखा चिम्लिएको आरोप लगाएका छन्।
बेइजिङले पटकपटक खेलको ‘राजनीतिकरण’ का विरुद्ध आवाज उठाएको छ र अन्तर्राष्ट्रिय ओलम्पिक समितिलाई खेल र विश्व मामिलालाई अलग गर्नका लागि यस्तै प्रकारको आह्वान गरेको छ ।
चीनका राष्ट्रपति सी जिनपिङले यस हप्ता ओलम्पिक प्रमुख थोमस बाकसँग महामारीको समयमा दुर्लभ भेट गरेका थिए।
बेइजिङ र वासिङ्टनबीचको तनाव हालका वर्षहरूमा व्यापार र प्रविधिलगायत विभिन्न क्षेत्रमा बढेको छ।
