काठमाडौं । ट्वेन्टी–ट्वेन्टी विश्वकप क्रिकेट खेल्ने नेपाली टोलीको घोषणा भएलगत्तै राष्ट्रिय क्रिकेट टोलीका पूर्वकप्तान सन्दीप लामिछाने आफू षड्यन्त्रको शिकार भएको बताएका छन् ।
बुधबार साँझ सामाजिक सञ्जालमा फेसबुमा स्टाटस लेख्दै लामिछानेले आफू षडयन्त्रको शिकार भएकोमा कुनै शंका नरहेको बताएका हुन् ।
सन्दीपले आफूविरुद्ध षडयन्त्र गर्नेलाई भगवानले मूल्याङकन गर्ने उल्लेख गर्दै सत्यतथ्य सबै कुरा समयसँगै बाहिर आउने बताएका छन् ।
उनले लेखेका छन्, ‘म लामो समय मौन रहेँ । म षडयन्त्रको शिकार भएकोमा मलाई कुनै शंका छैन । यस षड्यन्त्रका लागि आफ्नो भूमिका निर्वाह गर्ने सबैलाई ईश्वरले कल्याण गरून् । सबै कुरा ईश्वरमा छोडिदिन्छु । समयले सत्य प्रकट गरेर बताउनेछ ।’
नेपाल क्रिकेट संघ (क्यान)ले आगामी टि–ट्वेन्टी विश्वकप खेल्ने नेपाली टोलीको हिजै घोषणा गरेको थियो । उच्च अदालतमा सन्दीपको मुद्दा विचाराधीन रहँदा उनी विश्वकपको टोलीमा समावेश हुन सकेनन् ।
जबरजस्ती करणीको आरोपमा सन्दीप काठमाडौं जिल्ला अदालतबाट दोषी ठहर भएका छन् । उनले जिल्लाको फैसला चित्त नबुझाउँदै उच्च अदालतमा पुनरावेदन दिएका छन् । अहिले यो मुद्दा उच्च अदालतमा विचाराधीन छ ।
