काठमाडौं । ओमानमा जारी एसीसी प्रिमियर कप २०२४ मा नेपाल एक खेल अगावै समूह विजेता भएको छ ।
प्रतियोगिता अन्तर्गत मंगलबार साउदी अरेविया कतारसँग १५ रनले पराजित भएसँगै नेपाल समूह ए बाट विजेता बनेको हो । अब नेपालले समुहचरण खेलअन्तर्गत बुधबार साउदी अरेबियासँग खेल्दैछ ।
समूह ए मा नेपालबाहेक अन्य कुनैपनि टोलीले ६ अंक जोड्न सक्ने छैनन् । ४ खेल खेलको कतारको ४ अंक, ३ खेल खेलेको साउदी अरेबियाको २ अंक, ३ खेल खेलेको मलेसियाको र हङकङको २/२ अंक छ ।
नेपालले सेमिफाइनलमा समूह बी को उपविजेतासँग खेल्नेछ । समूह बीमा सोमबार ओमानले युएईलाई नौ विकेटले हराएको थियो । उक्त नजिताले ओमान समूह बी को विजेता र युएई उपविजेताको बन्ने सम्भावना बलियो रहेको छ ।
समूह बी मा ओमान ३ खेलमा ६ अंकका साथ शीर्ष स्थानमा छ । ३ खेलमध्ये २ मा जित र एउटामा हारसहित समान ४ अंकका साथ कुवेत दोस्रो र युएई तेस्रो स्थानमा छ । बहराइन ३ खेल र कम्बोडिया २ खेलमा अंक विहीन हुँदै पुछारमा छन् ।
बुधबार ओमानले कुवेत र युएईले कम्बोडियासँग खेल्नेछन् । ओमान र युएई दुबै सहज रुपमा विजयी हुने सम्भावना छ । त्यसैले, समुह ए को विजेता नेपाल र समुह बी को उपविजेता युएई सेमिफाइनलमा भिड्ने समीकरण देखिन्छ ।
प्रतियोगिता विजेताले टी-२० एसिया कप खेल्न पाउनेछन् । शीर्ष तीन टोलीले एसीसी इमर्जिङ टिम्स एसिया खेल्न पाउनेछन् ।
