काठमाडौँ । इन्डियन प्रिमियर लिग (आईपीएल) को १७औँ संस्करणमा बिहीबार राजस्थान रोयल्स र दिल्ली क्यापिटल्सबिच भिडन्त हुँदैछ । जयपुरस्थित सवाई मानसिंह स्टेडियममा हुनलागेको खेल नेपाली समय अनुसार बेलुकामो ७:४५ बजेबाट सुरु हुनेछ ।
जारी प्रतियोगितामा राजस्थान र दिल्ली दुवैले आफ्नो दोस्रो खेल खेल्न लागेका हुन् । राजस्थान पहिलो खेलमा विजयी भएको थियो भने दिल्लीले पहिलो खेलमा हार बेहोरेको थियो । पहिलो खेलमा राजस्थानले लखनउ सुपर जाइन्ट्सलाई २० रनले हराएको थियो भने दिल्ली पञ्जाब किङ्ससँग चार विकेटले पराजित भएको थियो ।
हेड-टु-हेड
आईपीएलमा हालसम्म राजस्थान रोयल्स र दिल्ली क्यापिटल्सबिच कुल २७ खेल खेलिएको छ । जसमा १४ खेलमा राजस्थान रोयल्स विजयी भएको छ भने १३ खेल दिल्ली क्यापिटल्सले जितेको छ ।
राजस्थानको घरेलु मैदानमा हालसम्म यी दुई टोलीबिच कुल ६ खेल खेलिएकोमा रोयल्सले चार खेलमा सफलता हात पारेको छ । बाँकी दुई खेलमा भने दिल्ली क्यापिटल्स विजयी भएको छ ।
पछिल्लो ६ वर्षयता भने राजस्थान रोयल्सले आफ्नो घरेलु मैदानमा दिल्लीलाई हराउन सकेको छैन । पछिल्लो पटक सन् २०१८ मा राजस्थानले जयपुरमा दिल्लीलाई हराएको थियो ।
आईपीएलको जारी सिजनमा संजु सामसन राजस्थान रोयल्सका लागि सर्वाधिक रन बनाउने खेलाडी हुन् । उनले लखनउ सुपर जाइन्ट्सविरुद्धको पहिलो खेलमा अविजित ८२ रन बनाएका थिए ।
यस्तै, राजस्थानका लागि ट्रेन्ट बोल्डले सर्वाधिक विकेट लिएका छन् । उनले पहिलो खेलमा दुई विकेट लिएका थिए ।
यस्तै, यस सिजनमा कुलदीप यादव दिल्ली क्यापिटल्सका लागि सर्वाधिक विकेट लिने खेलाडी हुन् । उनले आफ्नो पञ्जाबविरुद्धको खेलमा दुई विकेट लिएका थिए । कुलदीपसँगै खलिल अहमदले पनि दुई विकेट लिएका थिए ।
पहिलो खेलमा ब्याटिङमा भने कुनै पनि खेलाडी चल्न सकेका थिएनन् । दिल्लीका लागि साई होपले सर्वाधिक ३३ रन बनाएका थिए ।
वर्षाको सम्भावना न्यून
बिहीबार जयपुरमा चर्को गर्मी हुने देखिन्छ । मौसम विभागका अनुसार आज जयपुरमा वर्षाको कुनै सम्भावना छैन । बिहीबार जयपुरको तापक्रम २५ देखि ३९ डिग्री सेल्सियसको बिचमा रहने बताईएको छ ।
राजस्थान रोयल्सको सम्भावित प्लेईङ ११ :
संजु सामसन (कप्तान, विकेटकिपर), यशस्वी जैसवाल, जस बट्लर, रियान पराग, ध्रुव जुरेल, शिमरोन हेटमायर, रविचन्द्रन आश्विन, युजवेन्द्र चहल, ट्रेन्ट बोल्ट, नान्द्रे बर्गर र सन्दीप शर्मा ।
दिल्ली क्यापिटल्सको सम्भावित प्लेईङ ११:
ऋषभ पन्त (कप्तान/विकेटकिपर), डेभिड वार्नर, मिचेल मार्स, साई होप, रिकी भुई वा अविषेक पोरेल, अक्षर पटेल, सुमित कुमार वा ललित कुमार, कुलदीप यादव, खलिल अहमद, एनरिच नोर्जे र इशान्त शर्मा ।
