एजेन्सी । रोयल च्यालेन्जर्स बैंगलोरका लागि आइतबारको दिन एकदमै विशेष रह्यो । आरसीबीले उपाधि जित्न नसकेको १६ वर्षको खडेरी अन्त्य गरेको छ । विराट कोहलीले आरसीबीका लागि गर्न नसकेको काम स्मृति मन्धानाले गरिन् ।
मन्धनाले आरसीबीलाई वुमन्स प्रिमियर लिगको उपाधि जिताएकी हुन् । फाइनल खेलमा बैंगलोरले दिल्लीलाई ८ विकेटले पराजित गरेको हो ।
नयाँ दिल्लीको अरुण जेटली स्टेडियममा टस जितेर ब्याटिङमा आएको दिल्ली क्यापिटल्स १८.३ ओभरमा ११३ रनमा अलआउट भयो । जवाफमा बैंगलोरले १९.३ ओभरमा २ विकेटले लक्ष्य भेट्टायो ।
आरसीबीका एलिस पेरीले अविजित ३५ र ऋचा घोषले १७ रनको योगदान दिएकी थिइन् । सोफी डिभिनले ३२ र कप्तान स्मृति मन्धानाले ३१ रन जोडिन् ।
यसअघि दिल्लीका लागि ओपनर शेफाली वर्माले २७ बलमा ४४ रनको इनिङ खेलिन् भने कप्तान मेग ल्यानिङले २३ रनको योगदान दिएकी थिइन् । श्रेयंका पाटिलले ४ विकेट लिइन् भने सोफी मोलिनक्सले एक ओभरमा ३ विकेट लिइन् । उनी खेलको प्लेयर अफ द म्याच घोषित भइन् ।
११४ रनको सहज लक्ष्य बैंगलोरका ब्याटर्सले निकै संयमित ढंगले पछ्याएका थिए । कप्तान स्मृति मन्धाना र सोफी डिभिनको ओपनिङ जोडीले टोलीको जितको जग बसाल्यो ।
दुबैले ४९ बलमा ४९ रनको ओपनिङ पार्टनरसिप गरे । त्यसपछि एलिस पेरी (नटआउट ३५)सँगै टोलीको स्कोर ८२ रनमा पुर्याइन् ।
यहाँ, स्मृति आउट भएपछि, पेरीले कमान्ड लिइन् र ऋचा घोष (नटआउट १७) सँगसँगै टोलीलाई लक्ष्यमा पुर्याइन् । दिल्लीका शिखा पाण्डे र मिन्नु मणिले एक–एक विकेट लिए ।
टस जितेर पहिले ब्याटिङ रोजेपछि दिल्लीले शेफाली वर्मा र कप्तान मेग ल्यानिङको साथमा राम्रो सुरुवात गरेको थियो । दुबैले ४३ बलमा ६४ रनको ओपनिङ पार्टनरसिप गरे । यहाँबाट टोलीले ठूलो स्कोर बनाउने देखिन्थ्यो तर ओपनर शेफाली वर्मा आउट हुनेबित्तिकै विकेट झर्ने प्रक्रिया सुरु भयो ।
टोलीले ५५ रनमा थप ९ विकेट गुमाएको थियो । कप्तान मेग ल्यानिङले इनिङ्सलाई सम्हाल्ने असफल प्रयास गरिन् । टोलीका बाँकी ब्याटर्सले खास केही गर्न सकेनन् ।
बैंगलोरका लागि श्रेयंका पाटिलले ४ विकेट लिइन् भने सोफी मोलिनक्सले ३ विकेट लिइन् । यस्तै आशा शोभनाले दुई विकेट लिइन् ।
