काठमाडौँ । गण्डकी प्रदेशसभा सदस्य दीपक मनाङेले नेकपा (एकीकृत समाजवादी) त्याग गरको घोषणा गरेका छन् ।
योसँगै गण्डकीको राजनीति रोचक मोडमा पुगेको छ । ४ मंसिर २०७९ को प्रदेशसभा चुनावमा मनाङबाट स्वतन्त्र हैसियतमा विजयी मनाङे त्यसको १५ दिनपछि १९ मंसिरमा (एकीकृत समाजवादी) प्रवेश गरेका थिए ।
तर अहिले सत्ता समीकरणका कारण गण्डकीमा सरकार बनाउने र टिकाउने खेल भइरहँदा उनले नेकपा एस त्यागेको घोषणा गरेका हुन् ।
आइतबार मनाङेले आफूले एकीकृत समाजवादी पार्टी परित्याग गरेको भन्दै गण्डकी प्रदेशसभा सचिवालयमा पत्र दिएका छन् ।
मनाङेले आफूले स्वतन्त्र हैसियतमा चुनाव जितेकाले स्वतन्त्र नै रहने भन्दै पत्र दिएपछि प्रदेशसभा सचिवालय परामर्शमा जुटेको छ ।
प्रदेशसभा सदस्य मनाङेले गण्डकीमा अप्ठेरो अवस्था देखिएकाले मध्यावधि चुनावमा जान सक्ने अवस्था रोक्न आफूले स्वतन्त्र रहने निर्णय गरेको प्रतिक्रिया दिएका छन् ।
केन्द्रमा २१ फागुनमा एमाले–कांग्रेससहितको गठबन्धन बनेपछि त्यसको असर गण्डकी प्रदेशमा परेको छ भने मुख्यमन्त्री सुरेन्द्रराज पाण्डे विश्वासको मत लिनुपर्ने अवस्थामा छन् ।
६० सदस्यीय गण्डकी प्रदेश सभामा कांग्रेसको २७, एमालेको २२, माओवादी केन्द्रको सभामुखसहित ८, राप्रपाको २ र दीपक मनाङे छन् । यो स्थितिमा मुख्यमन्त्रीले विश्वासको मत पाउने अवस्था छैन भने एमाले–माओवादीले पनि सरकार बनाउन सक्ने अवस्था छैन ।
गण्डकीमा हालसम्म राप्रपा निर्णायक देखिन्छ । अर्कोतर्फ मनाङे पनि स्वतन्त्र बनेपछि अहिलेको सत्ता समीकरणअनुसार सजिलै सरकार बन्ने स्थिति देखिँदैन ।
