इङलिस प्रिमियर लिगमा यस सिजन निकै फर्ममा देखिएको एस्टन भिल्ला पछिल्ला केही खेलहरुमा राम्रो प्रदर्शन गर्नबाट चुकेको पाइएको छ । यो सहित पछिल्ला पाँच खेलमध्ये दुई खेलमा एस्टन पराजित भएको छ ।
आइतबार भिल्ला पार्कमा सम्पन्न खेलमा टोटेनह्याम हस्परले एस्टनलाई ४—० गोल अन्तरले पराजित गरेको छ । टोटेनह्यामका लागि जेम्स म्याडिसनले ५०औं मिनेटमा पहिलो गोल गरेका थिए ।
लगत्तै ५३ औं मिनेटमा ब्रेनान जोन्सनले दोस्रो गरेर टिमको पकड मजबूत बनाएका थिए । खेलको अन्त्यतिर इन्जुरी समयमा दुई गोल भएको थियो । ९१औं मिनेटमा सोन ह्युङ मिन र ९४ औं मिनेटमा टिमो वेर्नरले गोल गरेका थिए ।
यो जितसँगै टोटनह्यामको २७ खेलबाट ५३ अंक प्राप्त भएको छ र अंक तालिकामा पाँचौं स्थानमा छ । तर एक खेल बढी खेलेको एस्टन भिल्लाको २८ खेलबाट ५५ अंक सहित चौथो स्थानमा यथावत छ ।
प्रिमियर लिगको शीर्ष चार स्थानमा रहेका टिमबीचको अंकका कारण प्रिमियर लिग निकै रोचक मोडमा छ । पहिलो स्थानमा रहेको आर्सनलको ६४, दोस्रो स्थानमा रहेको लिभरपुलको ६३ र तेस्रो स्थानमा रहेको म्यान्चेस्टर सिटीको ६२ अंक छ ।
आजै दोस्रो र तेस्रो स्थानमा रहेका लिभरपुल र म्यान्चेस्टर सिटीबीच खेल हुँदैछ ।
