काठमाडौं । त्रिकोणात्मक टि-२० सिरिजमा नेदरल्यान्ड्सले लगातार दोस्रो जित हात पारेको छ ।
नामिबियालाई ५९ रनले पराजित गर्दै नेदरल्यान्ड्स ४ अंकसहित तालिकाको शीर्ष स्थानमा उक्लिएको छ । नामिबियाको २ अंकको साथ दोस्रोमा र नेपाल अंकविहिन छ ।
जितको लागि २ सय ४८ रनको लक्ष्य पछ्याएको नामिबियाले निर्धारीत ओभरमा ७ विकेट गुमाएर १ सय ८८ रन मात्र बनायो ।
नामिबियाको लागि जेन ग्रीन र जान फ्रिलिंकले समान ४२-४२ रन जोडे । फ्रेलिंकले २७ बलमा ३ चौका र २ छक्कासहित ४२ रन बनाए । ग्रीनले २० बलमा ४ चौका र ३ छक्कासहित ४२ रन बनाउदा जेपी कोट्जी २६, कप्तान जेजे स्मिथ र रुबेन ट्रम्पलम्यानले १९–१९ रन बनाए ।
नेदरल्यान्ड्सका भान डर गुग्टेनले २ विकेट लिदा भिभियन किंग्मा, फर्द क्लासेन, आर्यन दत्त, साइब्रान्ड एंगलब्रेक्ट र रोलेफ भान डर मर्वे १–१ विकेट लिए ।
त्यसअघि कीर्तिपुरस्थित टियू क्रिकेट मैदानमा टस जितेर पहिला ब्याटिङ रोजेको नेदरल्यान्ड्सले माइकल लेभिटको शतकमा पाँच विकेट गुमाएर दुई सय ४७ रन बनाएको थियो। टियुमा टि२० क्रिकेटमा बनेको यो नै सबैभन्दा ठूलो योगफल हो ।
नेदरल्यान्ड्सका लागि ओपनर ब्याट्सम्यान माइकल लेभिटले उत्कृष्ट शतकीय ईनिङ खेलेका थिए । उनले ६२ बलमा १० छक्का र ११ चौकासहित एक सय ३५ रन बनाए । जारी शृङ्खलामा कुनै पनि ब्याट्सम्यानले यति धेरै रन बनाएको छैन ।
त्यस्तै, साइब्रान्ड एंगलब्रेक्टले ४० बलमा ७५ रन जोड्दा तेजा निदामनुरुले १८ रन थपे ।
नामिबियाका बलर रुबेन ट्रम्पलम्यानले दुई विकेट लिए ।
