काठमाडौँ । तीन खेलको एकदिवसीय सिरिज नेपालले जितेको छ । भर्खरै सम्पन्न खेलमा क्यानडालाई चार विकेटले हराउँदै नेपालले सिरिजमाथि कब्जा गरेको हो ।
योसँगै नेपालले सिरिजमा २–० को अग्रता समेत बनाएको छ । यसअघिको खेल नेपालले सात रनले जितेको थियो । अब अन्तिम खेल सोमबार हुनेछ ।
क्यानडाले दिएको २८६ रनको लक्ष्य पछ्याएको नेपालले ४५.१ ओभरमा ६ विकेटको क्षतिमा लक्ष्य भेट्टायो । नेपालको जितमा कप्तान रोहित पौडेल, देव खनाल र अनिल शाहले अर्धशतकीय पारी खेले ।
रोहितले ८७, देवले ७६ तथा अनिलले ५० रनको योगदान दिए । यस्तै, भिम सार्कीले २३, पवन सर्राफले १४ र आसिफ शेखले १० रन जोड्दा कुशल मल्ल र सोमपाल कामी ९–९ रनमा नटआउट रहे ।
क्यानडाका लागि बलिङतर्फ हर्ष ठाकेर र इश्वरजीत शोहीले २–२ विकेट लिँदा साद बिन जफर र दिलप्रीत सिंहले १–१ विकेट लिए ।
त्यसअघि टस जितेर ब्याटिङ थालेको क्यानडाले निर्धारित ५० ओभरमा ९ विकेटको क्षतिमा २८५ रन जोड्यो । क्यानडाका लागि आरोन जोनसोनले अर्धशतकीय इनिङ्स खेले । उनले ६२ बलमा ६५ रन जोडे ।
यस्तै, नवनित धालिवालले ४६, श्रेयस मोभ्वाले ४०, पर्गात सिंहले ३८, निकोलास किर्तोनले २०, दिलप्रीत बजवाले १९ शाहिद अहमदजाईले १३ रन जोड्दा उदय भगवान २० रनमा नटआउट रहे ।
बलिङतर्फ नेपालका कुशल मल्ल र रोहित पौडेलले २–२ विकेट लिए भने आकाश चन्द, सोमपाल कामी, पवन सर्राफ र सुर्य तामाङले १–१ विकेट लिए ।
