लन्डनः यस सिजनको इङलिस प्रिमियर लिगको उपाधि दौडमा झिनो आशा लिएको म्यान्चेस्टर युनाइटेडले गएरातिको खेलमा वेस्टह्याम युनाइटेडलाई १–० गोल अन्तरले पराजित गरेको छ ।
यो जितसँगै म्यान्चेस्टर युनाइटेड कूल ५७ अंकका साथ लिगको दोस्रो स्थानमा कायम छ । म्यान्युले खेलमा वेस्टह्याम माथि निरन्तर दबाब राखेपनि आफैंले भने गोल गर्न सकेन । एक मात्र गोल वेस्टह्यामका क्रेग डसनको आत्मघाती गोल उपहार पाएको थियो ।
खेलको ५३औं मिनेटमा डसनले गरेको आत्मघाती गोल मार्फत म्यान्चेस्टर युनाइटेडले एक गोल गर्न सफल भएको थियो । यही नै निर्णायक गोल भएको थियो ।
लिगको शीर्ष स्थानमा रहेको म्यान्चेस्टर सिटीको ३० खेलबाट ७१ अंक छ, र एक खेल कम खेलेको अर्थात २९ खेल खेलेको म्यान्चेस्टर युनाइटेडको ५७ अंक छ । यी दुई बीचको अंक दूरी १४ अंक छ । तर म्यान्चेस्टर सिटीको फर्म हेर्दा यसपटकको उपाधि सिटीले जित्ने लगभग सुनिश्चित छ ।
गएरातिकै अर्को खेलमा आर्सनलले टोटेनह्याम हस्पर्सलाई २–१ गोल अन्तरले पराजित गरेको छ ।
आर्सनलका लागि मार्टिन ओडिगार्ड र अलेक्जान्डर ओकाजेटीले गोल गरेका थिए भने टोटेनह्यामका लागि एक मात्र गोल एरिक लामेलाले गरेका थिए ।
त्यस्तै, लेस्टर सिटीले पनि लिगको पुछारमा रहेको शेफिल्ड युनाइटेडलाई ५–० गोल अन्तरले पराजित गरेर लिगको तेस्रो स्थानमा रहेको छ ।
