काठमाडौँ । केपी ओली कप २०८० फुटबल प्रतियोगिताको प्रत्यक्ष प्रशारण कान्तिपुर टिभीले गर्ने भएको छ । राष्ट्रिय युवा संघ नेपालको आयोजनामा हुने प्रतियोगिताको प्रशारण अधिकार कान्तिपुर टिभीले लिएको हो ।
आज आइतबार एक कार्यक्रमकाबीच केएमजीका सीईओ शिशिर पछाइ, र राष्ट्रिय युवासंघ नेपालको तर्फबाट अध्यक्ष क्षितिज थेबेले सम्झौता पत्रमा हस्ताक्षर गरेका छन् ।
प्रतियोगिता फागुन ११ देखि १९ गतेसम्म काठमाडौँमा हुनेछ । फाइनलबाहेक सबै खेल च्यासलस्थित च्यासल रंगशालामा हुनेछ । फाइनल खेल दशरथ रंगशालमा हुने आयोजकले जनाएको छ ।
प्रतियोगिताको यो दोस्रो संस्करण हो । गत वर्ष भएको पहिलो संस्करणमा मछिन्द्र एफसीले सातदोबाटो युथ क्लबलाई सडनडेथमा हराएर उपाधि जितेको थियो । नेपालका ए डिभिजन र विदेशी प्रतिष्ठित टिमहरुलाई प्रतियोगितामा सहभागी गराइने आयोजकले जनाएको छ ।
प्रतियोगिताको विजेताले नगद ११ लाख र उपविजेताले ५ लाख पाउनेछ । प्रतियोगिताको उत्कृष्ट खेलाडीले १ लाख तथा उत्कृष्ट गोलकिपर, सर्वाधिक गोलकर्ता र उदीयमान खेलाडीले ५०-५० हजार पाउने छन् ।
यस्तै म्यान अफ दि म्याचलाई १५ हजार नगद प्रदान गरिनेछ ।
