काठमाडौं । नेपालीमा एउटा उखान छ– जाँतोलाई भन्दा हातोलाई हतार । यसको अर्थ हो– जसको काम हो, त्यसले गर्दैन तर अरुलाई हतार हुन्छ जसले काम गर्नै सक्दैन । हो, त्यस्तै भएको छ यतिखेर नेपाली काँग्रेसमा ।
काँग्रेसमा पनि जो प्रधानमन्त्रीको उमेदबार हो उसलाई हतार छैन तर अरुलाई चाहिँ तत्कालै सरकारमा जानुपर्ने खाँचो छ । यदि काँग्रेसले सरकारको नेतृत्व पायो भने प्रधानमन्त्रीका उमेदबार हुन पार्टी अध्यक्ष शेरबहादुर देउवा । काँग्रेसको संसदीय दलको नेता शेरबहादुर देउवा नै प्रधानमन्त्रीका उमेदवार हुन् ।
तर हतार चाहिँ उनलाई होइन रामचन्द्र पौडेललाई छ । रामचन्द्र पौडेलले यसअघि सरकारमा जानै हुदैन भनेर देउवाको बाटो छेक्न खोजे पनि अहिले भने जसरी भए पनि सरकारमा जानुपर्ने र त्यसको नेतृत्व काँग्रेसले गर्नुपर्ने भनी कस्सिएका छन् ।
शुक्रबार बसेको काँग्रेसको केन्द्रीय समितिको बैठकमा पनि प्रधानमन्त्रीको राजीनामा माग्ने निर्णय पौडेलकै जोडबलमा भएको थियो । सायद, पौडेलकै मुख राखिदिन नै सभापति देउवाले यो निर्णय गरिदिएको देखिएको छ ।
किनभने सभापति देउवा तथा काँग्रेसका अरु सबैजसो नेताले प्रधानमन्त्री केपी ओलीले राजीनामा दिनु पर्दैन भने यसअघि कहिल्यै भनेका थिएनन् । त्यसैले यो निर्णयलाई नयाँ भन्न सकिँदैन ।
तर पौडेलेका युटर्नभित्र केछ भन्ने बारेमा भने त्यति बुझ्न सकिएको छैन । केही समयअघि सम्म उनले प्रधानमन्त्री बन्न सभापतिले खुट्टा उचाल्ने होइन, पार्टी बनाउनुपर्छ भनेर भाषण गर्दै हिँड्थे । तर आज पौडेले एक्लै सरकार गठनका लागि कम्मर कसेर लागेका छन् ।
उनी आज जसपाका नेता महन्थ ठाकुरलाई भेट्न पुगे । उनले त्यहाँ यति सम्म भन्न भ्याए कि बरु प्रधानमन्त्रीमा देउवाको विकल्प खोजौँला तर ओलीलाई फाल्नुपरो । ओली सरकारकै निरन्तरता चाहेका ठाकुरसम्म पुगेर पौडेलले खोज्ने ओलीको विकल्प कस्तो हो ?
फेरि प्रधानमन्त्री बन्ने त कुनै पनि संसदीय दलको नेता हो भन्ने कुरा रामचन्द्र पौडेलजस्ता वरिष्ठ प्रजातान्त्रिक नेतालाई यहाँ सिकाउने धृष्टता गरिएन, उनलाई आफै थाहा छ । अनि नेपाली काँग्रेसको संसदीय दलको नेता देउवा हुन् भन्ने कुरा पनि उनैलाई थाहा छ । त्यसो भए काँग्रेसको सरकार बन्दा उनले खोज्ने विकल्प को हो त ? के ठाकुरसँग पौडेलले उनैलाई या सो दलका नेता बाबुराम भट्टराईलाई प्रधानमन्त्री बनाउने प्रस्ताव गरेका हुन् ?
देउवाले राजनीतिक परिवर्तनको आगामी सिन राम्रोसँग देखेका छन् । सरकार बनाउने र ढाल्न पनि सक्ने क्षमता राख्ने देउवाको यो मौनतालाई बुझ्न पौडेलले किन सकेका छैनन् ? कम्तीमा देउवा अहिले प्रधानमन्त्री हुन किन तयार छैनन् भनेर त बुझ्नुपर्ने हो नि, होइन र ?
अनि कुनै प्रधानमन्त्रीले आफूलाई दिएको समर्थन फिर्ता लेउ भनेर स्पष्ट र निर्धक्कसँग भन्न सक्छ ? हिजो प्रधानमन्त्रीको स्पिचको त्यो वाक्य एकपटक फेरि दोहोराएर सुन्ने हो भने पनि त्यो वाक्यले धेरै कुरा बोलेको छ । किन प्रधानमन्त्रीले आफूलाई दिएको समर्थन फिर्ता लिनु भनेर माओवादीलाई धम्की दिएका छन् ?
प्रधानमन्त्रीको निकटका नेता भन्छन्– प्रधानमन्त्रीसँग राजनीतिका कम्तीमा पनि पाँच ओटा कार्ड छन्, तर अहिलेसम्म उनले दुइ ओटा मात्र कार्ड प्रयोग गरेका छन् र ती सबै एलो कार्ड मात्र हुन् । तिनै कार्डमा नै प्रधानमन्त्री बलिया छन् भने अझ रातो कार्ड देखाउन त धेरै स्टेप नै बाँकी छ ।
त्यसो भए पौडेलहरुले सरकार बनाउने बहुमत कहाँबाट जुटाउँछन् ? देउवाले आफूलाई प्रधानमन्त्री बन्ने रहर छैन, पार्टी बलियो बनाउने र निर्वाचनमा जाने हो भनेर लिएको अडानलाई उल्टै सरकारतर्फ धकेल्नुपर्नाको कारण रामचन्द्रहरु नै बुझुन् । यसलाई यतिखेर राजधानीका कतिपय राजनीतिक जानकारहरु काँग्रेसमा बिँड तात्यो, ताप्के तातेन भनेर पनि भन्न थालेका छन् ।
