एजेन्सी । विराट कोहलीको ४९ औं शतकको मद्दतमा भारतले एकदिवसीय विश्वकपमा दक्षिण अफ्रिकालाई ३२७ रनको लक्ष्य दिएको छ । कोलकातामा टस जितेर ब्याटिङ गरेको भारतले निर्धारित ५० ओभरमा ५ विकेट गुमाएर ३२६ रन बनायो ।
विराटले १२१ बलमा नटआउट १०१ रनको शतकीय इनिङ खेले । उनले सचिन तेन्दुलकरको एकदिवसीय क्रिकेटमा सर्वाधिक शतक प्रहार गर्ने विश्व कीर्तिमानको बराबरी गरेका छन् ।
कोहली आफ्नो जन्मदिनमा विश्वकपमा शतक प्रहार गर्ने भारतका पहिलो र विश्वकै तेस्रो ब्याट्सम्यान बनेका छन् ।
विराट कोहली एकदिवसीयमा सबैभन्दा छिटो ४९ शतक पूरा गर्ने ब्याट्सम्यान पनि बनेका छन् । उनले २७७ औं इनिङ्समा यो उपलब्धि हासिल गरेका हुन् । सचिन तेन्दुलकरले ४५१ इनिङ्समा यति धेरै शतक बनाएका थिए ।
पावरप्लेको शुरुवाती ओभरमा भारतीय कप्तान रोहित शर्मा र शुभमन गिलले धमाकेदार ब्याटिङ गरे । दुवैले दक्षिण अफ्रिकाका बलरलाई निरन्तर दबाब दिए ।
रोहित–गिलले ५ ओभरमा ६१ रन बनाएका थिए । टोलीले ६२ रनमा कप्तान रोहित शर्माको विकेट गुमाएको थियो । यहाँ रोहित २४ बलमा ४० रन बनाएर आउट भए । उनलाई कप्तान टेम्बा बाभुमाको हातमा कागिसो रबाडाले क्याच आउट गरेका थिए ।
रोहित आउट भएपछि गिल–कोहलीले रन बनाउने जिम्मा लिए र पावरप्लेमा स्कोरलाई ९० भन्दा माथि पुर्याए । भारतीय टोलीले पहिले १० ओभरमा एक विकेट गुमाएर ९१ रन बनाएको थियो ।
यस्तै श्रेयस अय्यरले ८७ बलमा ७७, सूर्यकुमार यादवले १४ बलमा २२ रन जोड्दा रविन्द्र जडेजा १५ बलमा २९ रनसहित अविजित रहे । दक्षिण अफ्रिकाका लागि लुंगी एनजीडी, मार्को यानसेन, कागिसो रबाडा, केशव महाराज र तवरिज साम्सीले एक–एक विकेट लिए ।
भारतले जारी विश्वकपमा सेमिफाइनलको टिकट काटिसकेको छ ।
