एजेन्सी । एकदिवसीय विश्वकपमा भाग लिने पाकिस्तानी क्रिकेट टोली र यसका अधिकारीहरू अझै पनि भारतबाट भिसाको पर्खाइमा छन् ।
पाकिस्तानी टोली सेप्टेम्बर २७ मा दुबई हुँदै भारत पुग्नुपर्नेछ । बाबर आजमको नेतृत्वमा रहेको टोलीले दुई दिनपछि सेप्टेम्बर २९ मा न्यूजिल्याण्डसँग पहिलो अभ्यास खेल खेल्ने छ ।
पाकिस्तान क्रिकेट बोर्ड (पीसीबी) स्रोतका अनुसार खेलाडीहरू इस्लामाबादस्थित भारतीय उच्चायोगबाट भिसाको लागि पर्खिरहेका छन्, जसका कारण उनीहरूको दुबई जाने योजना रद्द गरिएको छ । पीसीबीले यो मामिला आईसीसीसँग उठाएको पनि स्रोतले बताएको छ ।
पाकिस्तानी टोलीले पछिल्लो पटक २०१६ को टी–२० विश्वकपमा भारत भ्रमण गरेको थियो । पाकिस्तानले आईसीसी टूर्नामेन्ट वा एसिया कपमा मात्रै भारतसँग सामना गर्छ ।
