काठमाडौं । राप्रपाले भदौ २७ गते काठमाडौंमा गर्ने विरोध सभालाई व्यवस्थित र प्रभावकारी बनाउन पार्टीका बागमती प्रदेश समितिका अध्यक्ष, पूर्वमन्त्री विक्रमबहादुर थापाको अध्यक्षतामा उपत्यकाव्यापी बृहत विरोध सभा आयोजक मुल समिति गठन गरेको छ।
पार्टी केन्द्रीय कार्यालयमा आज अध्यक्ष राजेन्द्र लिङ्देन र पार्टीका वरिष्ठ नेताहरूको उपस्थितिमा बसेको बैठकले थापाको संयोजकत्वमा मूलसमिति गठन गरेको हो । समितिको सदस्य सचिवमा प्रवक्ता एवं प्रमुख सचेतक ज्ञानेन्द्र शाही रहनुभएको छ। यसैगरी उपत्यकाबाट प्रतिनिधित्व गर्ने पार्टीका पदाधिकारी एवं सदस्यहरु, बागमती प्रदेशका १३ जिल्लाका जिल्ला अध्यक्षहरु, सम्पर्क समाज समन्वय विभागका प्रमुख र सबै भातृ संगठनका अध्यक्षहरु मूल समितिको सदस्य रहनुभएको छ।
राप्रपाको आइतबार बसेको केन्द्रीय पदाधिकारी बैठकले गौवंश हत्याको विरोध गर्न, गौवंश हत्याको विरोधमा विभिन्न संघसंस्थाबाट देशभर भइरहेका प्रदर्शनमा समर्थन र ऐक्यबद्धता प्रकट गर्न, सामाजिक सदभाव कायम गर्न, हिन्दुराष्ट्र र राजसंस्था पुन:स्थापनाको आवाजलाई बुलन्द बनाउन, भ्रष्टाचार नियन्त्रण र भ्रष्टाचार काण्डको पूर्ण छानबिन गर्न, शिथिल अर्थतन्त्रमा सुधार गरी स्वदेशमा रोजगारीको अवसर सिर्जना गर्न, महंगी नियन्त्रण गरी आम जनतालाई राहत प्रदान गर्न र जनजीवन सहज बनाउन सरकारलाई दबाब दिन भदौ २७ गते काठमाडौंमा बृहत विरोध सभा आयोजना गर्ने निर्णय गरेको थियो ।
मुल समितिको बैठक मंगलबार अपरान्ह १।०० बजे पार्टी केन्द्रीय कार्यालयमा बस्ने प्रवक्ता एवं प्रचार विभाग प्रमुख मोहन कुमार श्रेष्ठ जानकारी दिनुभयो ।
